سەرۆک وەزیرانی عێراق ڕایگەیاند، ئێستا کار لەسەر ئەوە دەکەین رێکارەکانی هەناردەکردنەوەی نەوتی خاو بۆ بەندەری جەیهان تەواو بکەین، لاپەڕەیەکی نوێ لەگەڵ ئەو کۆمپانیایانە بکەینەوە کە لە هەرێمی کوردستان کار دەکەن.
ئەمڕۆ چوارشەممە، محەممەد شیاع سوودانی، سەرۆک وەزیرانی عێراق لە میانی وتەیەکی لە کۆڕبەندی هەولێر کە لە ڕێی ڤیدیۆوە پێشکەشی کرد، باسی لە پەیوەندییەکانی نێوان هەولێر و بەغدا کرد و ڕایگەیاند، ئەم کابینەیەی ئێمە کاری زۆری بۆ دۆزینەوەی چارەسەری هەمیشەیی کردووە، بەتایبەتی بۆ ئەو کێشانەی بە کێشەی هەڵپەسێردراوی نێوان بەغدا و هەولێر ناودەبران. ئێمە ئەوەمان هەڵگێڕایەوە بۆ هەل و دەرفەتی هاریکاری و پێگەیشتن.
وتیشی: “توانیمان ئەو کێشانە لە چوارچێوە سیاسییەکانیان دەربهێنین و بیانخەینە چوارچێوەی یاساییەوە. پاش تێپەڕاندنی هەمواری یاسای بودجەش، ئێستا کار لەسەر ئەوە دەکەین رێکارەکانی هەناردەکردنەوەی نەوتی خاو بۆ بەندەری جەیهان تەواو بکەین، لاپەڕەیەکی نوێ لەگەڵ ئەو کۆمپانیایانە بکەینەوە کە لە هەرێمی کوردستان کار دەکەن، بە جۆرێک کە بەشدار بێت لە بنیاتنانی ئابووریی عێراق و مافی هاونیشتیمانیی هەرێمی کوردستانیش مسۆگەر بکات، ئەوەش لە رێگەی گەرەنتیکردنی ئەوەی کە مافی خۆیان بەبێ هیچ کەموکوڕییەک لە مووچە و شایستە داراییەکانی دیکەیان وەرگرن”.
لە بەشێکی دیکەی وتەکەیدا سەرۆک وەزیرانی عێراق ڕایگەیاند، ئەمڕۆ بەهۆی باوەڕمان بە دیموکراسی، کۆتاییمان بە سەردەمی جەنگ و ململانێ هێناوە کە ساڵانێکی درێژ گیرۆدەی بووین. هەنگاومان بەرەو سەردەمی ئاشتی و سەقامگیری و گەشەکردن ناوە. عێراق ئەمڕۆ بە متمانەی تەواوەوە بە خۆی، لەگەڵ کۆمەڵگەی نێودەوڵەتی دا بەرەو کامڵبوون هەنگاو دەنێت و پشت ئەستوورە بە دیدگایەکی رۆشن کە لەسەر هاوکاری و هاوبەشیی کارا لەگەڵ دەوڵەتانی دۆست و دەستەخوشک دامەزراوە و کار بۆ بەدیهێنانی ئاییندەیەکی باشتر بۆ گەلەکەمان دەکات.
وتیشی: “حکومەتی ئێمە لە ماوەی ئەم دوو ساڵەی رابردوودا پێداگر بووە لەسەر گرتنەبەری سیاسەتێک کە لەسەر بنەمای “عێراق بەر لە هەر شتێک” دامەزراوە. دەمانەوێت بەرژەوەندییەکانی عێراق و گەلەکەی لە پێشی پێشەوەی کارەکانمان بێت. ئەوە سەرباری کارلێکی ئەرێنییانە لەگەڵ وڵاتانی دەوروبەرمان و کۆمەڵگەی نێودەوڵەتیش”.
جەختیشیکردەوە کە پەیوەندییەکانی خۆمان لەگەڵ دەوڵەتانی دۆست و دەستەبرا لەسەر بنەمای بەرژەوەندیی هاوبەش و رێزگرتنی دوولایەنە بەهێزتر کردووە، بەوەش عێراقمان کردووەتە پردی گفتوگۆ و هاوکاری و بەشدار بووە لە بەدەستهێنانەوەی رۆڵی پێشڕەوانەی لە ناوچەکەدا. ئەمەش لە سایەی تێگەیشتنێک کە وەکو رێبازێکی کردەنی گرتوومانەتەبەر، ناومان لێناوە “دیپلۆماسیی بەرهەمدار”. بۆیە کرانەوەی عێراق لەسەر هەردوو ئاستی هەرێمی و نێودەوڵەتی، بەشێکە لەو رێبازەی کاری لەسەر دەکەین، بۆئەوەی هاوبەشییە ئابوورییەکانمان فراوانتر بکەین و سوود لە شارەزایی نێودەوڵەتی وەربگرین بۆ بەهێزکردنی ئابووریی نیشتمانی. ئەم هەوڵانەشمان بە تەنیا لەگەڵ یەک لایەنی دیاریکراو نییە، بەڵکو هەموو هاوبەشەکانمان لە کۆمەڵگەی نێودەوڵەتی دەگرێتەوە.
سوودانی ڕاشیگەیاند، ئێمە بەردەوامین لە بەهێزکردنی هاوکاریمان لە هەموو بوارەکان دا، بۆئەوەی بتوانین بەدیهێنانی گەشەی بەردەوام و سوودی دوولایەنە مسۆگەر بکەین، بۆ ئەم مەبەستەش دەستمان دایە پڕۆژەی هێڵی گەشەپێدان بۆئەوەی ببینە پردێکی ئابووری و کۆمەڵایەتی و کولتووری لەنێوان ئاسیا و ئەورووپا. هەروەک بەردەوامیش کارمان لەسەر بەهێزکردنی هاوکاریی ئەمنی و بەرەنگاربوونەوەی تیرۆر کردووە و پەیوەندیی پتەومان لەگەڵ وڵاتانی ئەندامی هاوپەیمانیی نێودەوڵەتی، لە سەرووی هەمووشیانەوە ویلایەتە یەکگرتووەکانی ئەمریکا، هەیە. ئێمە ئێستا لە سەروبەندی دانوستاندنێکی دوولایەنەداین لەگەڵ ئەو دەوڵەتانەی ئەندامی هاوپەیمانیی نێودەوڵەتین، ئەوەش بۆئەوەی بتوانین چوارچێوەیەکی روون و دیار بۆ هاریکاریی دوولایەنە بۆ بەرەنگاربوونەوەی تیرۆر و تووندئاژۆیی دابنێین، بەوەش بەدیهێنانی ئاسایش و سەقامگیری لە عێراق و ناوچەکەدا مسۆگەر بکەین، هەنگاو بەرەو پەیوەندیی دوولایەنە لەگەڵ هەموو وڵاتانی ئەندامی هاوپەیمانیی نێودەوڵەتی بنێین.
