سەرۆک کۆمار ڕایگەیاند، عێراق توانای وەڵامدانەوەی پێشێلکارییەکانی سەر سنوور و سەروەرییی وڵاتەکەی هەیە، بەڵام باوەڕیان بە چارەسەری دیپلۆماسی و دیالۆگە بۆ چارەسەرکردنی کێشەکان.
ئەمڕۆ چوارشەممە، د. لەتیف ڕەشید، سەرۆک کۆمار لە میانی وتەیەکی لە کۆڕبەندی هەولێر وتەیەکی پێشکەشکرد و ڕایگەیاند، چڕکردنەوەی هاوکاری و هەماهەنگی نێوان حکومەتی فیدراڵی و حکومەتی هەرێمی کوردستان لە هەموو بوارەکاندا لە بەرژەوەندی هەموواندایە.
وتیشی: “عێراق دەوڵەمەندە بە خەڵکەکەی و هەمەچەشنی پێکهاتە نەتەوەیی و کۆمەڵایەتییەکانی و دەوڵەمەندیشە بە سامان و سەرچاوە سروشتییەکانی، دەبێت هەموو ئەو دەوڵەمەندییانە بۆ باشترکردنی ئابووری و خێراکردنی خێرایی گەشەکردن و خزمەتکردنی هەموو پارێزگاکان بەکاربهێنرێت”.
سەرۆک کۆمار ئەوەشی خستەڕوو کە سیاسەتی نوێی عێراق لەسەر بنەمای ڕێزگرتن لە سەروەری وڵاتان و هەڵبژاردنی گەلان داڕیژراوە، هەر دەستوەردانێک لە کاروباری ناوخۆی عێراق ڕەتدەکەینەوە، عێراق توانای وەڵامدانەوەی هەموو دەستوەردان و پێشێلکارییەکانی سەر سنوور و خاکەکەی هەیە، بەڵام باوەڕمان بە چارەسەری دیپلۆماسی و دیالۆگی دوولایەنە هەیە.
وتیشی: “سەرەڕای سەقامگیری نرخی نەوت، بەڵام کێشەی تەواونەکردنی پارەی پڕۆژە خزمەتگوزاری و وەبەرهێنانەکانی وەزارەت و پارێزگاکانمان هەیە لەلایەن وەزارەتی داراییەوە کە ئەوەش پرۆسەی گەشەپێدانی ئابوری و ئاوەدانکردنەوە لە عێراق دوادەخات”.
