بوومەلەرزەیەک بەگوڕی ٦،١ پله بەپێوەری ڕێختەر له باکووری دوورگەی سولاویسی ئیندۆنێزیا ڕوویدا.
ناوەندی توێژینەوەی جیۆلۆجی ئەمریکا (USGS)، بڵاویکردەوە بوومەلەرزەکە کاتژمێر ٠٦:٥٥ خولەک بەکاتی ناوخۆ، لە قوڵایی ١٠ کیلۆمەتری باکووری دوورگەکە ڕوویداوە.
دامه‌زراوه‌ی كه‌شناسی و جیۆفیزیایی ئیندۆنێزیا، هۆشداری دروستبوونی شەپۆلی گەورەی بەهۆی بوومەلەرزەکەوە ڕانەگەیاند.
ڕاگەیاندنی وڵاتەکە هیچ زانیارییەکی لەبارەی زیانە گیانیی و ماڵییەکان بڵاونەکردەوە بەڵام باس لەوە کرا کە ڕوودانی پاشلەرزە لە ناوچەکە بەردەوامە.
ئیندۆنێزیا کە خاوەنی ١٣٠ گڕکانی چالاکە، دەکەوێتە ناوچەی ئەڵقەی ئاگری زەریای هێمن و، بە یەکێک لە وڵاتە چالاکەکانی بومەلەرزەزانی جیهان دادەنرێت.
