وەزارەتی ئەوقافی هەرێم ڕایدەگەیەنێت، ئێوارەی ڕۆژی هەینی لیژنەی باڵای بینینی مانگ بۆ دیاریكردنی یەكەم ڕۆژی مانگی رەمەزان كۆببێتەوە و بڕیار لە یەكەم ڕۆژی مانگی ڕەمەزانی پیرۆز دەدات.
نەبەز ئیسماعیل، وتەبێژی وەزارەتی ئەوقافی هەرێم بۆ (خەڵك) ڕایگەیاند، لیژنەی باڵای بینینی مانگ لە هەولێر و لیژنە لاوەكییەكانی پارێزگاكان لە ئێوارەی ڕۆژی هەینی 28ی شوبات ( 29ی شەعبان) كۆدەبنەوە و چاودێری بینینی مانگ دەكەن و بڕیار لە یەكەم ڕۆژی مانگی ڕەمەزانی پیرۆز دەدەن.
ڕاشیگەیاند، “ئەگەر ئێوارەی هەینی مانگ بینرا ڕۆژی شەممە دەبێتە یەكەم رۆژی مانگی ڕەمەزان و ئەگەر مانگ نەبینرا ڕۆژی یەك شەممە دەبێتە یەكەم ڕۆژی مانگی ڕەمەزانی پیرۆزی ئەمساڵ”.
جەختیشی كردەوە، لە هەرێمی كوردستان پشت بە هیچ پێشبینی و زانیارییەكی فەلەكناسی نابەسترێت بۆ دیاری كردنی مانگی ڕەمەزان و جەژن، بەڵكو تەنها پشت بە بەڵگەی شەرعی دەبەسترێت، كە بینینی مانگە.
ئەمە لەكاتێكدایە، كە بەپێی پێشبینی شارەزایانی گەردوونی و ناوەندە فەلەكییەكان، ڕۆژی شەممە 1ی ئازار دەبێتە یەكەم ڕۆژی مانگی ڕەمەزانی ئەمساڵ.
