قوباد تاڵەبانی پێشوازی لە شێخ مورشید خەزنەوی، مامۆستای ئایینی و كەسایەتی نیشتمانی ڕۆژئاوای كوردستان دەكات و پێی دەڵێت: هەوڵەکانی بۆ یەکگرتوویی و یەکڕیزی کورد جێی پێزانینە و پێویستە هەموو لایەک گوێی لێ بگرن.
قوباد تاڵەبانی، جێگری سەرۆك وەزیرانی هەرێم ڕایگەیاند، شێخ مورشید خەزنەوی و باوکی “شەهید شێخ مەعشوق خەزنەوی” دوو سیما و کەسایەتیی ئایینی و نیشتمانیی دڵسۆز و خۆشەویستی ڕۆژئاوای کوردستانن. شێخ مەعشوق لەپێناو نەتەوەکەیدا شەهید بوو، ئێستاش شێخ مورشیدی کوڕی درێژە بە رێبازەکەی دەدات.
ڕاشیگەیاندووە، ئەمڕۆ زۆر خۆشحاڵ بووم بە دیداری شێخ مورشید، هەوڵەکانی بۆ یەکگرتوویی و یەکڕیزی کورد جێی پێزانینە و پێویستە هەموو لایەک گوێی لێ بگرن و پشتیوانی لێ بکەن.
جەختیشی كردەوە، بە هەموو توانامانەوە پشتیوانی براکانمان لە ڕۆژئاوای کوردستان دەبین و لە هیچ هەوڵێکیش بۆ یەکڕیزی و یەکهەڵوێستی کورد درێخی ناکەین.
