بەرەی گەل، كە لەلایەن لاهور شێخ جەنگی-یەوە سەرۆكایەتی دەكرێت سەبارەت بە هێرشكردنە سەر مامۆستایان و فەرمانبەران، “كە لە سەر ڕێگەی عەربەت خێمەیان بۆ ڕێگری لە تانكەرە نەوتەكان هەڵداوە” پەیامێكی بڵاوكردەوە و دەڵێت: دەرکەوت کە دەسەڵاتدارانی ئەم زۆنەش خۆیان بەرپرسی بەتاڵانبردنی سەروەتی نەوتی و نانەوتی ئەم هەرێمەن.
بەرەی گەل لە ڕاگەیەنراوەكەیدا ئاماژەی بەوەكردووە، لەکاتێکدا کە فەرمانبەران و مامۆستایانی هەرێمی کوردستان بەهۆی دژواری دۆخی ژیان و دواکەوتنی مووچەکانیان، پەنا دەبەنەبەر مانگرتن و خۆپیشاندان و دەربڕینی ناڕەزایەتی و ڕێگریکردن لە بەتاڵانبردنی نەوتی هەرێمی کوردستان، ئێمە چاوەڕێ بووین کە دەسەڵات پێشوازی لەم هەنگاوە بکردایە، بەڵام دەرکەوت کە دەسەڵاتدارانی ئەم زۆنەش خۆیان بەرپرسی بەتاڵانبردنی سەروەتی نەوتی و نانەوتی ئەم هەرێمەن.
ڕاشیگەیاندووە، هەربۆیە بەشێوەیەکی نابەرپرسیارانە و دوور لەسیمای دیموکراسی هەڵیانکوتایە سەر خێمەی مامۆستایان و چالاکوانان، بەداخەوە ژمارەیەک مامۆستا و ڕۆژنامەنووسیان دووچاری لێدان و دەستگیرکردن کردەوە.
ئاماژەی بەوەشكردووە، ئێمە لەبەرەی گەل، یٔئیدانەی ئەم جۆرە رەفتارانە دژ بەمامۆستایان و فەرمانبەران و چالاکوانان دەکەین، هاوکات پشتیوانی داوا ڕەواکانیان دەکەین کە ئامانجیان خزمەتکردنە بەتێکڕای چین و توێژەکانی خەڵکی کوردستان.
