محەمەد ئەمین، ئەو جوتیارە کوردەی لەلایەن سوپای عێراقەوە پەلاماردرا و خەریك بوو بە ملپێچەكەی خۆی بیخنكێنن، لەجیاتی ئەوەی ئەو سەربازە دەستگیر بكرێت، كەچی سەربازەكە سکاڵای لەسەر جوتیارەكە تۆمار كردووە.
محەمەد ئەمین، ئەو جوتیارە کوردەی كە ماوەیەك پێش ئێستا لەلایەن سوپای عێراقەوە پەلاماردرا ڕایگەیاند، “ئەمڕۆ سەردانی دادگای دووبز-م کرد بۆ پێشکەشکردنی بەڵگە و وتەی شایەدەکان لەسەر ڕووداوی پەلاماردانم لەلایەن سەربازەکەی سوپای عێراق، کە هەفتەی ڕابردوو لە گوندی شەناغە ئازاری پێگەیاندبووم، بەڵام کە چوومە دادگا شۆکبووم کاتێک پێیان ڕاگەیاندم ئەو سەربازە سێ ڕۆژ پێش ئێستا هاتووە بۆ دادگا و سکاڵای یاسایی لەسەر من تۆمارکردووە.
ئاماژەی بەوەشكرد، سەربازەکە داوایکردووە کە سزا بدرێم لەسەر ئەوەی گوایە من پەلامارمداوە لە کاتی بەجێهێنانی ئەرکی پیشەیی خۆی، ئەم سکاڵایە ئەوەمان پێدەڵێت کە ئەو سەربازە دەستگیرنەکراوە هەروەکو لەسەر زاری فەرماندەی فیرقەی 8 بەمن ڕاگەیەنرا.
وتیشی، “بە پێی داواکەی ئەو من تاوانبارم، رێکارەکانی دادگاش بەجۆرێکن کە بەپێی ئەو ماددەیەی تێیدا من پێی تاوانبارکراوم مافی گشتی تێدایە و ڕەنگە سەرەڕای دەستگیرکردنم و حوکمدانم، غەرامەش بکرێم لەکاتێکدا کە من زەڕەیەک پاشگەزنیم و ئەوەی من بناسێت دەزانێت کە ترس لە گیانی مندا نییە لە بەرامبەر کەیسی بەرگریکردن لە مافی گشتی و جوتیاران”.
جەختیشی كردەوە، “داوادەکەم کە لێکۆلینەوە بکرێت و هەوڵبدرێت دادگاکه ئاڕاستەی یەکسانی بگرێتەبەر و نەکەوێتە ژێر فشاری لابەلا و ئەو زوڵمە قبوڵ نەکات، کە بەڕوونی دیارە کێ تاوانبارە”.
