وەزراتی بەرگری ڕایگەیاند، ھێشتا، ١٣٠ سەربازیی سووریا لە عێراق ماون و لە بنکەیەکی ئەمنیی دان و ئاماژەی بەوەشدا کە ئەمریکا لە پڕچەککردنی سوپاکەیان بەردەوامە.
سابت عەباسی، وەزیری بەرگری عێراق لە دیمانەیەکدا لەگەڵ کەناڵی “ئەلعەرەبییە”، ئاماژەی بەوەداوە کە ھێشتا، ١٣٠ سەربازیی سووریا لە عێراق ماون و لە بنکەیەکی ئەمنیی دان و گوتی: “ئەو سەربازانەی سووریامان سەرپشک کردووە لەوەی دەیانەوێت بگەڕێنەوە بۆ وڵاتەکەیان یان لە عێراقدا، بمێننەوە”.
ئەوەشی خستەڕوو کە ھەوڵدەدەن، ڕێکارێکی یاسایی بۆ مانەوەی ئەو سەربازە سوورییانە بدۆزنەوە کە لە دوای ڕووخانی ڕژێمەکەی بەشار ئەسەد بەرەو عێراق هەڵاتن.
وەزیری بەرگریی ڕەتی کردەوە کە سەربازانی سووریا لە عێراق، لەلایەن گرووپە چەکدارەکانەوە بەکاربھێندرێن و ڕایگەیاند، ئەو دەنگۆیانەی کە لەوبارەیەوە بڵاوکراونەتەوە، دوورن لە ڕاستییەوە.
سابت عەباسی لەبارەی جموجۆڵەکانی ڕێکخراوی تیرۆریستی داعش لە ژمارەیەک ناوچەی عێراق، گوتی: “لەئێستادا، داعش لەسەر شێوەی چەتەکان لە ژمارەیەک ناوچە لە پارێزگاکانی نەینەوا، کەرکووک و ئەنبار جموجۆڵی ھەیە”.
سابت عەباس لەبارەی بوونی ھێڵی سووری ئەمریکا سەبارەت بە پڕچەککردنی سوپای عێراق، گوتی: “ئەمریکا، ھیچ ھێڵێکی سووری سەبارەت بە پڕچەککردنی سوپای عێراق، نییە”.
