دەستەی داکۆکی لە مامۆستایان و فەرمانبەرانی ناڕازی ڕاگەیەندراوێکی لەسەر گرژییەکانی شەوی ڕابردووی سەر ڕێگەی عەربەت سلێمانی بڵاوکردەوە و ڕایگەیاند، حکومەتی عێراق کەمتەرخەم بووە لە پاراستنی شکۆی تاقی عێراق لە هەرێمی کوردستان.
بەپێی ڕاگەیەندراوی دەستەکە، تیایدا هاتووە: دەستەی داکۆکی ئیدانەی پەلاماردان و دەستگیرکردنی مامۆستایان دەکات و ئەوسیناریۆ داتاشراوە قێزەونە شەرمەزاردەکات بۆ لەکەدارکردنی ناو وناوبانگی پاک و بێگەردی مامۆستایان، کە لەهیچ خۆپیشاندانێک یان چالاکیەکی مەدەنێدا درەختێکیان نەشکاندوە و گوڵێکیان نەژاکاندوە، بەوپەڕی هەستی پڕ لەبەرپرسیاریەتیەوە مامەڵەیان کردووە.
باسی لەوەشکردووە: بەردهاویشتن و دەم و چاوهەڵبەستن و خۆشاردنەوە لەپشت ماسکە ڕەشەکانەوە کاری مامۆستایان نەبوە و نابێت، هەروەها بەردهاوێژە هێنراوەکان کاری یەکەمجاریان نیە و نابێت.
دەشڵێت: “حکومەتی عێراق وەک چۆن کەمتەرخەم بووە لە جێبەجێنەکردنی بڕیاری تەوطینکردنی مووچە، بەوشێوەیەش کەمتەرخەمە لە پاراستنی کەرامەت و شکۆی تاکی عێراقی لە هەرێمی کوردستان، بەرامبەر دەستدرێژیکردنە سەرمامۆستایان بێدەنگی هەڵبژاردووە”.
ئەوەشی وتووە: “دەستەی داکۆکی باش ئەودەسەڵاتە لەیاسا دەرچوە ئەناسێت، کەئامادەیە هەموو شتێک بکاتە قوربانی لەپێناو پڕکردنی گیرفانی بنەماڵە دەسەڵاتدارەکانیان، خوازیاری ئەوەین مووچە وبژێویمان بەیەکجاری لەدەستی بنەماڵە مافیایاکان و میلیشیا و دەستی پیس و نەگریسیان ڕزگاربکرێت”.
