لەسەر زەوییە دەگمەنەکان و سەرچاوە سروشتییەکان، کە ئەگەری هەیە بەهای سەدان ملیار دۆلار بێت، ئەمریکا و ئۆکراین لە ئەنجامدانی ڕێککەوتنێکی مێژوویی نزیکن.
ڕێککەوتنەکە، کە بڕیارە بەم نزیکانە واژۆ بکرێت، هەنگاوێکی گرنگە بۆ پتەوکردنی پەیوەندییەکانی نێوان هەردوو وڵات لە چەندین بواردا، لەوانە پشتیوانی ئابووری ئۆکراین و پێشکەشکردنی هاوکاری سەربازی.
بەگوێرەی ماڵپەڕی ئەکسیۆس، ڕەشنووسی ڕێککەوتنەکە ئاماژە بەوە دەکات؛ ئەمریکا بە نیازە پابەندبوونی خۆی بۆ بەردەوامبوون لە پاڵپشتیکردنی ئۆکراین لە ڕووبەڕووبوونەوەی ئاستەنگە ئەمنییەکان پشتڕاست بکاتەوە، ئەمەش لە چوارچێوەی هەوڵدان بۆ بەدەستهێنانی گەڕانەوەی سەرمایەگوزارییەکانی پێشووی لە ئۆکراین.
دۆناڵد ترەمپ، سەرۆکی ئەمریکا ڕۆژی دووشەممەی ڕابردوو لە میانی وتووێژەکانی لەگەڵ ئیمانوێل ماکرۆن هاوتا فەرەنسیەکەی لە کۆشکی سپی، دووپاتی کردەوە؛ ڕێککەوتن لەگەڵ ئۆکراین سەبارەت بە کانزا دەگمەن و بەنرخەکانی “زۆر نزیکە”.
حکومەتی ئۆکراین پێشتر پشتڕاستی کردبووەوە؛ دانوستانەکان لەسەر ئەو ڕێککەوتنە، کە واشنتۆن دەتوانێت دەستی بگات بە کانزاکانی ئۆکراین لە بەرامبەر پاراستنیدا، گەیشتووەتە قۆناغی “کۆتایی”.
واشنتن هیوادارە ئەم ڕێککەوتنە یارمەتیدەر بێت بۆ قەرەبووکردنەوەی ئەو پارە و کەرەستە سەربازییانەی لە سەرەتای شەڕی ڕووسیاوە بۆ ئۆکراینی هەناردووە، لە هەمان کاتدا بەشداری بکات لە بەهێزکردنی ئابووری ئۆکراین.
بەپێی ئەو زانیاریانەی دەست ماڵپەڕی ئەکسیۆس کەوتوون، ڕێککەوتنەکە دامەزراندنی “سندووقی وەبەرهێنانی ئاوەدانکردنەوە” لەخۆدەگرێت، کە تێیدا بڕە پارەیەکی زۆر لە پڕۆژەکاندا وەبەردەهێنرێت لەوانە کانگا و بەندەرەکان، هەروەها پڕۆژەکانی دیکە کە ئامانجیان بەهێزکردنەوە و سەقامگیری ئابووری ئۆکراینە.
هەروەها ڕەشنووسەکە ئاماژە بە پابەندبوونی ئۆکراین دەکات بۆ بەشداریکردنی دارایی لەم سندوقەدا، کە بەشدارییەکانی دوو هێندە زیاترە لەوەی ئەمریکا دابینی دەکات.
لە ڕەشنووسەکەدا بەڵێنی سەربازی ڕاستەوخۆی ئەمریکا دیاری نەکراوە، بەڵام ئامانجی سەرەکی ئەوەیە کە ئۆکراین لە بەرامبەر هەڕەشە دەرەکییەکان ئازاد و سەربەخۆ بمێنێتەوە.
ئەم ڕێککەوتنە کە ڕەنگە لە ڕۆژانی داهاتوودا واژۆ بکرێت، بە بڕگەیەکی گرنگ لەپەیوەندییەکانی نێوان هەردوو وڵات دادەنرێت و ڕەنگدانەوەی گۆڕانی ستراتیژییە لە مامەڵەکردن لەگەڵ مەلەفی ئۆکراین، هەروەها ئاسۆیەکی نوێ بەو وڵاتە دەبەخشێت بۆ گەیشتن بە سەقامگیری ئابووری و سیاسی دوای چەندین ساڵ لەململانێو شەڕ.
ئەم هەنگاوانە دوای پەرەسەندنی دۆخی ئەمنی ئۆکراین دێت کە وایکرد ڤۆلۆدیمیر زێلێنسکی سەرۆکی ئۆکراین جەخت لەسەر گرنگی واژۆکردنی ئەم ڕێککەوتنە لەگەڵ ئەمریکا بکاتەوە لە زووترین کاتدا، کە یارمەتیدەر دەبێت لە پاڵپشتیکردنی هەوڵەکانی ئاوەدانکردنەوە و بەرزکردنەوەی توانای ئۆکراین بۆ ڕووبەڕووبوونەوەی ئاستەنگەکانی داهاتوو.
هەر لەو چوارچێوەیەدا دۆناڵد ترەمپ، سەرۆکی ئەمریکا ڕایگەیاند، بەم نزیکانە ڕێککەوتنەکە لە کۆشکی سپی واژۆ دەکرێت، کە ڕەنگە هەفتەی داهاتوو میوانداری سەرۆکی ئۆکراین بکات بۆ ئەوەی بە فەرمی ڕێککەوتنەکە واژۆ بکات.
