دۆناڵد ترەمپ، سەرۆکی ئەمریکا ئاشکرایکرد، کار بۆ کۆتاییهێنان بە شەڕی نێوان ڕووسیا و ئۆکراین دەکات.
ترەمپ لە لێدوانێکی ڕۆژنامەوانیدا ڕایگەیاند، ڕەنگە زێلێنسکی لەم هەفتەیەدا یان هەفتەی داهاتوو سەردانی کۆشکی سپی بکات و چاوی بە سەرۆکی ڕووسیا بکەوێت.
ئاماژەی بەوەشکرد، “ڕەنگە لەماوەی چەند هەفتەیەکدا شەڕی ئۆکراین کۆتایی بێت”.
ترەمپ جەختیشیکردەوە “لەکاتی گونجاودا دەچمە مۆسکۆ”.
لە درێژەی قسەکانیدا سەرۆکی ئەمریکا وتی: پێدەچێت زۆر نزیک ببینەوە لە واژۆکردنی گرێبەستی زەویی کانە دەگمەنەکان لەگەڵ ئۆکراین.
ئاماژەی بەوەشکرد، هیچمان دەستنەکەوت لەو پارەیەی کە بە ئۆکراینماندا، ئەوەش هەڵەی ئیدارەی بایدن بوو.
ترەمپ ئاماژەی بەوەدا، “هەوڵدەدەین شەڕی نێوان ڕووسیا و ئۆکراین کۆتایی پێبهێنین و پێموایە لە ماوەیەکی کورتدا ڕێگەیەکی دوور و درێژمان بڕیوە” بە لەبەرچاوگرتنی ئەوەی کە “لە بەرژەوەندی ڕووسیایە کە بگەینە ڕێککەوتن، دڵنیام دەگەینە ڕێککەوتنێک بۆ کۆتاییهێنان بە شەڕەکە”.
