وەزیری بازرگانی حکومەتی ھەرێمی کوردستان ڕایدەگەیەنێت، ئەو بڕیارەی دراوە بۆ ئەوەی کارتی نیشتیمانی مەرج بێت بۆ پێدانی بەشەخۆراک بە ھاووڵاتیان، تەنیا بۆ ھەرێمی کوردستان نییە و بۆ ھەموو عێراقە و دەشڵێت: فۆڕمی خۆراک دەبێتە ئەلکترۆنی.
کەمال موسلیم، وەزیری بازرگانی حکومەتی ھەرێمی کوردستان ڕایگەیاند، ھۆکاری پێدانی بەشەخۆراکی ھاووڵاتیان کە کارتی نیشتیمانی کراوەتە مەرجێک بۆ ئەوەی بەشەخۆراکیان پێبدرێت، بۆ ئەوە دەگەڕێتەوە، کە فۆڕمی خۆراک لە عێراق و ھەرێمی کوردستان دەبێتە ئەلکترۆنی.
ڕاشیگەیاند، ئەو بڕیارەی دراوە، بۆ ئەوەیە کە پێویستە ھەمووان کارتی نیشتیمانییان ھەبێت، ئەمە بۆ ھەموو عێراقە و تەنیا بۆ ھەرێمی کوردستان نییە، چونکە کە فۆڕمی خۆراک بووە ئەلکترۆنی، پێویستە کارتی نیشتیمانییان ھەبێت.
جەختیشی كردەوە، جارێ دیار نییە ئەو بڕیارە کەی دەچێتە بواری جێبەجێکردنەوە، لەبەر ئەوەی ئەمە بڕیارێکی گشتییە، ھەر بۆیە کارتی نیشتیمانی کراوەتە مەرج بۆ بەشەخۆراکی مانگانە.
