سەرچاوەیەکی ئاگادار وادەی ناردنی لیستی مووچەی مانگی دوو و ناردنی پارە لە بەغداوە ئاشکرا دەکەن و دەڵێن”ڕۆژی چوارشەممە لیستەکە ڕەوانە دەکرێت”.
میدیای پارتی بڵاویکردەوە، دوو سەرچاوەی ئاگادار پێی ڕاگەیاندوون رۆژی چوارشەممە لیستی مووچەی مانگی دوو ڕەوانەی بەغدا دەکرێت و چاوەڕواندەکەین ڕۆژی دواتر بڕیار لەسەر خەرجکردنی پارەی مووچە بدرێت.
ئەو سەرچاوەیەی ئەنجوومەنی وەزیرانی هەرێمی کوردستان رایگەیاندووە “تێبینییەکانی بەغدا لەسەر لیستی مووچە چارەسەر کراون و رۆژی چوارشەممە لیستەکە دەنێردرێت”.
هاوکات بەرپرسێک لە وەزارەتی دارایی و ئابووریی هەرێمی کوردستان وێڕای پشتڕاستکردنەوەی زانیارییەکانی سەرچاوەکەی وتویەتی “لیستەکە چوارشەممە دەنێردرێت و چاوەڕوان دەکەین پێنجشەممە حکومەتی عێراق بڕیاری خەرجکردنی پارەی مووچەی مانگی دوو بدات”.
لەسەرەتای ئەم مانگەدا وەزیری دارایی حکومەتی عێراق، تەیف سامی، نووسراوێکی ئاڕاستەی حکومەتی هەرێم کرد و سێ داواکاری بۆ مووچەی مانگی دوو لە حکومەت کردووە، ئەوانیش:
1- پێدانی نووسراوی پارەدارکردنی مووچەی مانگی کانوونی دووەمی 2025ی فەرمانبەرانی هەرێمی کوردستان.
2- تەواوکردنی ناردنی داتای تایبەت بە جێکردن “تەوتین”ی فەرمانبەرانی هەرێمی کوردستان، بە گوێرەی ئەو میکانیزمەی کە لە بڕیاری دادگەی باڵای فیدراڵی دانراوە.
3- ناردنی داهاتی نانەوتی مانگی کانوونی دووەمی 2025 بۆسەر ئەو هەژمارەی کردوویانەتەوە لە بانکی ناوەندیی عێراق بە ژمارە ( 70018).
