کۆمەڵەی پزیشکیی دەروونیی کوردستان سکاڵا لەسەر ئەوکەسانە تۆماردەکەن کەلەسۆشیال میدیا خۆیان وەک پزیشک و پسپۆڕی دەروونی ناساندووە.
لە بەیاننامەیەکدا، کۆمەڵەی پزیشکیی دەروونیی کوردستان ڕایگەیاند، لەم ماوەی دواییدا خەڵکانێکی زۆر لە سۆشیال میدیا خۆیان وەک پزیشک و پسپۆڕی دەروونی ناساندووە، تا ئەو ڕادەیەی بابەتەکە لە حاڵەت دەرچووە و بۆتە دیاردە. ئەوەشی یارمەتیدەر بووە و بازاڕی ئەو کەسانەی گەرمکردووە، شەرم بووە لە نەخۆشیە دەروونییەکان، و هەندێک لە چارەخوازان حەزییان نەکردووە دەرکەون لای کەسانی تایبەتمەند و بەڵکو ویتستوویان لەپشت پەردەوە چارەسەربکرێن، وەک ئەوەی ڕەفتارێکی شەرمەزاریان کردبێت کە تووشی نەخۆشی دەروونی بوون.
کۆمەڵەی پزیشکیی دەروونیی کوردستان وەکو ئەرکێکی مرۆیی و لەپێناو پاراستنی چارەخوازان، سکاڵا لەسەر هەموو ئەو کەسانە تۆمار دەکات کە خۆیان بە پزیشك و پسپۆڕی دەروونی ناساندووە و هەڵگری هیچ جۆرە بڕوانامەیەکی پەیوەندیدار و باوەرپێکراو نین لەم بوارە، ئەمەش دوای زیادبوونی سەرهەڵدانی ئەم دیاردەیە و پێشکەشکردنی چارەسەری نادروست ونازانستی و زیان گەیاندنیش بە بەشێک لە چارەخوازان.
ئەوەشخراوەتەڕوو، لەگەڵ ئەوەی بەشێکی زۆری ئەوکەسانە هیچ پسپۆڕیەکیان لەو بوارە نیە و بە پێی بەدوا داچوونەکانمان زۆربەیان شارەزاییەیەکی ئەوتۆیان نیە تەنانەت ڕێنماییش بدەن، چی بگاتە ئەوەی کە چارەسەری دەروونیی پێشکەشبکەن.
بەپێێ ڕاگەیەندراوەکە، کۆمەڵەی پزیشکیی دەروونیی کوردستان، وەک ئەرکێکی مرۆیی و لە پێناو پاراستنی چارەخوازان لە ڕێگای داواکاری گشتییەوە سکاڵا تۆماردەکەن، و دەشڵێن”تا ئێستاش چەند سکاڵایەک گەیشتوونەتە دادگا و ئەو جۆرە کەسانە سزای خۆیان وەردەگرن”.
ڕوونیشیانکردۆتەوە، هەروەک چۆن چەپڵە بەدەستێک لێنادرێ! ئەگەر خەڵک هاوکارنەبن و وریا نەبن، نە ئێمە و نە داواکاری گشتی ناتوانین ئەو دیاردەیە بە تەنها بنبڕبکەین. بۆیە لێرەوە داواتان لێدەکەین بە هیچ ڕیکلامێکی سۆشیال میدیا هەڵنەخەڵەتێن و نەکەونە داوی ئەو کەسانەوە. داواشتان لێدەکەین لە هەر شوێنێک ئەو جۆرە کەسانەتان بەرچاو کەوت بە بەڵگەی ڤیدیۆیی و وێنە بۆمانی بنێرن، دڵنیاش بن ئێمە سڵ ناکەینەوە لەوەی ڕووبەڕووی یاسایان بکەینەوە.
