دوانیوەڕۆی ئەمڕۆ بوومەلەرزەیەک لە خۆرهەڵاتی کەلار ڕوویدا و هاووڵاتیان هەستیان پێ كردووە، بەڵام هیچ زیانێكی نەبووە.
سیروان ساڵح، شارەزای كەشناسی و بوومەلەرزەزانی بۆ (خەڵك) ڕایگەیاند، ئەمڕۆ لە کاتژمێر 12:52 ی پاش نیوەڕۆی ئەمڕۆ دوو شەممە بەکاتی کوردستان، بوومەلەرزەیەک بەگوڕی 2.9 پلە به پێوەری ڕێختەر لەنێوان شارۆچكەی كەلار و شارەدێی قۆرەتوو ڕوویدا.
ڕاشیگەیاند، بوومەلەرزەكە لەقوڵایی 8 کیلۆمەتر بووە و چەقی بوومەلەرزەکە لە گوندی بانزمینی سەیدکەریم بووە بەدووری 10 کیلۆمەتر لەسەنتەری شاری کەلار .
لای خۆشیەوە، دامكەزراوەی كەشناسی و بوومەلەرزەزانی عێراق بڵاویكردەوە، بوومەلەرزەكە لە ناوچەی سنووری عێراق بووە لە سنووری دیالە و 45 كیلۆمەتر لە كفری دووربووە و هاووڵاتیان هەستیان پێ كردووە.
