بافڵ تاڵەبانی، سەرۆکی یەکێتی نیشتمانی کوردستان لە کۆبوونەوەی لەگەڵ لەتیف ڕەشید، سەرۆک کۆماری عێراق ڕایگەیاند، یەکێتی هەموو هەوڵێک دەدات بۆ باشترکردنی ژیانی خەڵکی هەرێم و دوورخستنەوەیان لە ململانێ سیاسییەکان.
ئەمڕۆ دووشەممە، بافڵ تاڵەبانی، سەرۆکی یەکێتیی نیشتمانیی کوردستان، لە دەباشان پێشوازی لەتیف رەشید، سەرۆک کۆماری عیراق کرد.
بەپێی ڕاگەیەندراوی نووسینگەی سەرۆکی یەکێتی، لەمیانی دیدارەکەدا هەڵسەنگاندن بۆ دۆخی گشتی وڵات کرا و جەخت لە بەردەوامی گفتوگۆی بونیادنەرانە لەنێوان سەرجەم لایەنەکان کرایەوە بۆ زاڵبوون بەسەر ئاڵنگارییەکاندا و بەرزکردنەوەی ئاستی خزمەتکردنی هاووڵاتیان.
بەپێی ڕاگەیەندراوەکە، هەر لە دیدارەکەدا پەیوەست بە کێشەکانی هەرێمی کوردستان و عیراق هەردوولا پەرۆشانە دووپاتیان لە چارەسەرکردنی کێشەکان لەسەر بنەمای دەستوور و لێکتێگەیشتنەکان کردەوە.
ئەوەش هاتووە: “بافڵ تاڵەبانی بەڕێزەوە ڕۆڵ و هەوڵەکانی سەرۆک کۆماری بەرز نرخاند بۆ لەیەک نزیککردنەوەی لایەنە جیاوازەکان و گەیشتن بە چارەسەری نیشتمانی لە بەرژەوەندی سەقامگیری وڵاتدا و روونیکردەوە یەکێتی هەموو هەوڵێک دەدات بۆ باشترکردنی ژیانی خەڵکی هەرێمی کوردستان و دوورخستنەوەیان لە ململانێ سیاسییەکان کە خۆشبەختانە لەم هەنگاوەشدا سەرکەوتوو بووین”.
پەیوەست بە قەیرانی ناوچەیی و پێشهاتەکانی رۆژهەڵاتی ناوەڕاست، لە دیدارەکەدا گفتوگۆی ورد کرا و لەتیف ڕەشید، ڕایگەیاند: عێراق پشتگیری لە هەر هەوڵ و دەستپێشخەرییەک دەکات کە ئامانج لێی دۆزینەوەی رێگاچارەی ئاشتییانە بێت بۆ پاراستنی ئارامی و دوورخستنەوەی ناوچەکە لەشەڕ و ئاڵۆزی.
