بریکاری وەزارەتی پلاندانانی هەرێمی کوردستان ڕایدەگەیەنێت کە لە ساڵی داهاتووەوە بەشە بودجەی هەرێم لە سەر بنەمای ڕێژەی دانیشتووان زیاد دەکات.
ئەمڕۆ دووشەممە، سیروان محەممەد، بریکاری وەزارەتی پلاندانانی هەرێمی کوردستان دوای ئاشکراکردنی ئەنجامی سەرژمێرییە گشتییەکەی عێراق ڕایگەیاند، بە پێی ئەنجامی سەرژمێرییەکە ڕێژەی دانیشتووانی هەرێمی کوردستان لە 14٪ی کۆی گشتی دانیشتووانی عێراق زیاترە.
ڕوونیشیکردەوە ئێستا بەشە بودجەی هەرێم بە 12.67٪ دیاریکراوە و دەستکاری ناکرێت، بەڵام ساڵی داهاتوو لە کاتی دانان و گفتوگۆکردنی بودجەی گشتیی عێراق، دەبێت لەسەر بنەمای ڕێژە نوێیەکە پشکی هەرێمی کوردستانیش دیاری بکرێت.
ئەمڕۆ وەزارەتی پلاندانانی عێراق ڕایگەیاند، بە پێی ئەنجامی سەرژمێرییە گشتییەکە ژمارەی دانیشتووان 46 ملیۆن و 118 هەزار کەسە.
