سەرۆکی ئۆکراینا ڕایگەیاند ئامادەیە لە بەرامبەر ئەندامبوونی وڵاتەکەی لە هاوپەیمانیی ناتۆ واز لە پۆستەکەی بهێنێت و ڕەتیشیکردەوە کە ئەو هاوکارییانەی ئەمریکا لە جەنگی ڕووسیا پێشکەشی کردوون، وەرز بێت.
ڤۆلۆدیمێر زیلینسکی، سەرۆکی ئۆکراینا ڕایگەیاند ئامادەیە لە پێناو دەستەبەرکردنی ئاشتیی لە ئۆکراینا واز لە پۆستەکەی بهێنێت و ئەگەر دەرفەتێکی لەم شێوەیە بەردەست بێت، ئەوا لە بەرامبەر بوونی وڵاتەکەی بە ئەندام لە ناتۆ دەستلەکار بکێشێتەوە.
سەرۆکی ئۆکراینا تیشکی خستەسەر ئەوەی کە پێویستە لە پاڵ ئۆکراینادا، ئەمریکا، ڕووسیا و وڵاتانی ئەوروپا بەشداری لە گفتوگۆکانی ئاشتیی لە بارەی جەنگی ڕووسیا-ئۆکراینا بکەن.
زیلینسکی ئەوەشی خستەڕوو کە لە کیێڤی پایتەختی وڵاتەکەی لووتکەیەک ساز دەکرێت و، ١٣ هاوبەش دێنە کیێڤ و ٢٤یشیان لە ڕێگەی ئۆنڵاینەوە بەشداری دەکەن.
زیلینسکی جەختی لەسەر ئەوە کردەوە کە ئەو بڕە پارەیەی سەرۆکی ئەمریکا، دۆناڵد ترەمپ باسی لێوە دەکات قەرزدار نین و، ئۆکراینا ١٠٠ ملیار دۆلار هاوکاری لە ئەمریکا وەرگرتووە نەک ٣٥٠ ملیار دۆلار.
ڕاشیگەیاند: ”لەگەڵ بۆچوونی سەرۆکی پێشووی ئەمریکا جۆ بایدنم لە بارەی ئەوەی ئەم هاوکارییانەی ئەمریکا بەخشینە. بەخشین قەرز نییە. ڕێزمان بۆ هاوبەشەکانمان بێ سنوورە، بەڵام قەرزێکی ٥٠٠ ملیار دۆلاری قبوڵ ناکەین”.
