وەزیری دارایی حكومەتی هەرێم لەگەڵ نوێنەری فەرمانبەرانی گرێبەست كۆبووەوە و ڕایگەیاند، هەمیشە پشتیوانی داواکاریەکانی فەرمانبەرانی گرێبەست بووین.
بەپێیی ڕاگەیەنراوێكی وەزارەتی دارایی، ئەمڕۆ یەک شەممە ٢٣ی شوباتی ٢٠٢٥، ئاوات شێخ جەناب، وەزیری دارایی و ئابووری پێشوازیکرد لە نوێنەرانی بەشێک لە فەرمانبەرانی گرێبەستی دامەزراوی پەرەپێدان، کە لە وەزارەتی تەندروستی دەوام دەکەن و مووچەیان لەسەر داهاتی ناوخۆیە.
بەپێی ڕاگەیەنراوەكە، وەزیری دارایی، “وەک هەمیشە پشتیوانی خۆی بۆ دەستەبەرکردنی مافەکانیان دووپات کردەوە” و ڕایگەیاند، لەگفتوگۆکانیان لەگەڵ وەزارەتی دارایی عێراق داوای زیادکردنی میلاک و تەرخانی داراییان بۆ فەرمانبەرانی گرێبەست کردووە و چاوەڕوانن لەداهاتوویەکی نزیکدا لەگەڵ حکومەتی فیدڕاڵ لەسەر ئەو بابەتانە بگەن بە چارەسەرێکی گونجاو.
سەبارەت بە گۆڕینی ناونیشانی ئەو فەرمانبەرانە لە گرێبەستی پەرەپێدانەوە بۆ گرێبەستی ئاسایی لەسەر وەزارەتی دارایی، ئاوات شێخ جەناب ڕایگەیاند، وەک وەزارەتی دارایی ڕەزامەندین لەسەر گۆڕینی ناونیشانەکانیان لە گرێبەستی پەرەپێدانەوە بۆ گرێبەستی ئاسایی لەسەر وەزارەتی دارایی.
