وەزارەتی پلاندانانی عێراق بڕیاریدا سبەینێ دوو شەممە، ئەنجامی كۆتایی سەرژمێریی گشتیی دانیشتووان ڕابگەیەنێت.
ڕۆژی 20ـی تشرینی دووەمی 2024، پڕۆسەی سەرژمێریی گشتیی لەعێراق و هەرێمی كوردستان دەستی پێ كرد، تاكو 22ـتشرینی دووەمی 2024 بەردەوام بوو، بۆ ئەو مەبەستەش دوو ڕۆژ قەدەغەی هاتووچۆ لەسەرجەم ناوچەكانی عێراق و هەرێم ڕاگەیەنرا.
وەزارەتی پلاندانانی عێراق لە ڕاگەیەنراوێكدا ئاماژەی بەوەداوە، سبەینێ، محەمەد عەلی تەمیم، جێگری سەرۆك وەزیران و وەزیری پلاندانان لە كۆنفرانسێكی ڕۆژنامەوانیدا ئەنجامی كۆتایی سەرژمێریی گشتیی دانیشتووان ڕادەگەیەنێت.
ڕاشیگەیاندووە، كۆنفرانسەكە كاتژمێر 9:30ـی بەیانی، لە هۆتێل بابل لە بەغدا، بە ئامادەبوونی وەزیر، پەرلەمانتار، سەرۆكی دەستە و باڵێۆزەكانی وڵاتان بەڕێوەدەچێت.
لە 25ـی تشرینی دووەمی 2024 د. دارا ڕەشید، وەزیری پلاندانانی هەرێم لە كۆنفرانسێكی ڕۆژنامەوانیدا ئەنجامی بەرایی سەرژمێریی دانیشتووانی لە هەر چوار پارێزگاكەی هەرێم ڕاگەیاند و وتی: كۆی گشتیی ژمارەی دانیشتووانی هەرێم زیاتر لە 6 ملیۆن و 370 هەزار و 668 كەسە.
