دوابەدوای ئەو شەپۆلە بەفر و سەرمایەی ناوچەكانی هەرێمی كوردستانی گرتۆتەوە، بەپێی ڕاپۆرتە كەشناسییەكان شەپۆلەكە بەرەو كۆتایی دەڕوات، بەڵام پلەكانی گەرما بۆ نزمترین ئاست لەمساڵدا دادەبەزن، كە لە بەشێكی ناوچە شاخاوییەكان دەگاتە -18 پلەی سەدی.
لوقمان حەوێز، مامۆستای زانكۆ لە ئەمریكا و شارەزای كەشناسی و گەردوونی لە ڕوونكردنەوەیەكدا ئاماژەی بەوەكردووە، ئەمشەو (یەک شەممە لەسەر دوو شەممە) ساردترین شەوی زستانی ئەمساڵ 2024-2025 دەبێت لە باشوری کوردستان، كە سەرما و زوقم و شەختە هەموو شوێنەکان دەگرێتەوە و پلە نزمەکانی گەرما لەهەموو گوند و شارۆچکە و شارەکانی باشور لەخوار سفر دەبێت.
ڕوونیشی كردۆتەوە، هـەڵەبجە و سـلێمانی 7 لەژێر سفر، هـەولێر 3 لەژێر سفر، کەرکـوک 2 لەژێر سفر، دهـۆک 6 لە ژێر سفر، پێنـجوین 14 لەژێر سفر، چـۆمان 16 لەژێر سفر و حاجی ئۆمەران 18 لەژێر سفر دەبێت.
لای خۆشیەوە، محەمەد كەمال، شارەزای كەشناسی بۆ (خەڵك) ڕایگەیاند، له ئێستادا ئاسمانی ناوچه‌كه به‌ره‌و هه‌وری ته‌نك و لاواز ده‌چێت و سبه‌ی كۆتا كاریگه‌ری شه‌پۆله‌كه ده‌بێت و ئه‌مشه‌و له ناوچە شاخاوییه‌كانی ڕۆژهه‌ڵاتی هه‌رێم ئه‌گه‌ری به‌فربارین هه‌یه و بۆ سبه‌ی دوو شه‌ممه له‌نێوان كاته‌كانی نیوه‌ڕۆ بۆ دوای نیوه‌ڕۆ به هه‌بوونی هه‌وری پێویست پێشبینی به‌فر ده‌كه‌مه‌وه له‌سه‌نته‌ری كه‌ركوك و هه‌ولێر و سلێمانی و هه‌ڵه‌بجه و ڕه‌نگه به‌شێكی دهۆكیش بگرێته‌وه له‌گه‌ڵ ته‌واوی ناوچه شاخاوییه‌كانی هه‌رێمی كوردستان بڕی به‌فره‌كه‌ش زۆرنیه له‌سه‌نته‌ره‌كان ته‌نها ئه‌گه‌ری بارینی هه‌یه.
ڕاشیگەیاند، له‌ئێستادا ئەو بارسته هه‌وا سارده‌ی، كه پێشبینی كراوبوو بگاته شاره‌كانی هه‌رێمی كوردستان گەیشتووه و پله‌كانی گه‌رما نزمبونه‌ته‌وه و ئه‌مشەو و سبه‌ی چه‌قی هێزی هه‌وا سارده ڕوسیه‌كه و پله‌كانی گه‌رما زیاتر نزمده‌بێته‌وه و له‌ته‌واوی ناوچه شاخاوییه‌كان شه‌خته ڕووده‌دات و شه‌قامه‌كان ده‌یبه‌ستێت.
دەشڵێت: ئه‌توانم بڵێم ئه‌مشه‌و و سبه‌ی دوو شەممه ساردترین شه‌و و ڕۆژی ساڵ ده‌بێت و چه‌قی سه‌رما تونده‌كه ده‌بێت و بای لەگه‌ڵه هه‌ندێك جار.
هاوكات، بەپێی ڕاپۆرتی کەشناسی هەرێم، ئەمڕۆ یەک شەممە، کەش سارد و نیمچە هەور دەبێت، لەسەر لوتکەی شاخە بەرزەکان و هەندێ ناوچەی جیا جیا لە کاتی بوونی هەر جۆرە دابارینێک بەشێوەی بەفر دەبێت، لە شەودا دیاردەی بەستن و دروستبوونی شەختە ڕوو دەدات.
لە بارەی کەشوهەوای سبەینێ دوو شەممە، کەشناسی هەرێم دەڵێت: کەش سارد دەبێت لەگەڵ دروست بوونی شەختە لە کاتەکانی بەیانی و بوونی هەور لە ناوچە شاخاوییەکان، پلەکانی گەرما نزمتر دەبێت بە یەک بۆ دوو پلە بەراورد بە تۆمارکراوەکانی ئەمڕۆ.
