قوباد تاڵەبانی، جێگری سەرۆك وەزیرانی هەرێم و سەرۆكی تیمی دانوستانكاری یەكێتیی بۆ پێكهێنانی كابینەی دەیەمی حكومەت لەگەڵ پارتی ڕایدەگەیەنێت، تو خوا واز لە مەوزوعی تەوتین بهێنن، وەڵا مێشكی ئەو میللەتەتان تێكدا، گرنگ ئەوەیە مووچە بێت.
قوباد تاڵەبانی، جێگری سەرۆك وەزیرانی هەرێم بۆ ڕۆژنامەنووسان ڕایگەیاند، كۆبوونەوەكەی دوێنێ لەگەڵ پارتی زۆر باش ڕۆیشت، ئەتوانم بڵێم هەندێ هەنگاوی زۆر باش چوینە پێشەوە، هەندێك لەو خاڵانەی، كە پێشووتر ڕەنگە ناكۆك بووبین لەسەریان، كەمتر بوون، ئێستا خاڵە كۆكەكان زۆر زیاترن لە خاڵە ناكۆكەكان.
ڕاشیگەیاند، ئومێدەوارم بەرەو ئەوە بڕۆین، كە هیچ خاڵێكی ناكۆك نەمێنێ لەنێوانمان لەچوارچێوەی ئەم دیدگا هاوبەشەی حوكمڕانی.
سەبارەت بە تەوتینی، وتی، “توخوا واز لە مەوزوعی تەوتین بهێنن، بەڕاستی ئەزانی چۆنە، تو خوا. تو سەری من، واز لەو مەوزوعە بێنن، بابە وەڵا مێشكی ئەو میللەتەتان تێكدا. ئەمە مەوزوع نییە، موهیم ئەوەیە معاشەكە بێت، شتەكەتان وا گەورە كردووە”.
وتیشی، “باوەڕ بكە ئەو ڕۆژە سێ سەفیرم لابوو هەموو حەپەسابوون ئەیانوت ئەرێ ئەمە چییە تو خوا ئەمە مەوزوعە ئەم میللەتەی ئێوە وا مەشغوڵ بوون پێی”.
جەختیشی كردەوە، “كاكە موهیم ئەوەیە معاشەكە بێت و بە بانكی بكرێت، دوربكەوینەوە لە زەرف و تەوزیعكردن بە گوێنی”.
ئەمە لەكاتێكدایە، كە ئەمڕۆ بافڵ تاڵەبانی،سەرۆکی یەکێتی ڕایگەیاند، لە میانی کۆبوونەوەی لەگەڵ مەسرور بارزانی باسیان لە (هەژماری من) کردووە و پرۆژەکەش هەڵمەتێکی میدیایی گەورەی دەوێت بۆ ڕوونکردنەوەی لایەنە ئەرێنییەکانی.
