دوای ڕووداوەکەی گوندی گوهەرزێ، پارتی کرێکارانی کوردستان بڕیاری دا هەر ئۆتۆمبێلێک لە ئامێدی ئاڵای کوردستانی لەسەر نەبێت بیکەنە ئامانج.
هێزەکانی پاراستنی گەل، باڵی سەربازی پەکەکە ڕایگەیاند، ڕۆژی 21ی شوبات کاتێک گروپێکی هێزەکانیان لە گوندی گوهەرزێی سەر بە ئامێدی تێپەڕ دەبوون، لە ڕێی ئۆتۆمبێلێکی مەدەنییەوە کرانە ئامانج و سێ گەریلایان شەهید بوون.
ڕاشیگەیاند، هەرچەندە ناسنامەی ئەنجامدەرانی هێرشەکەیان بۆ یەکلا نەبووەتەوە، بەڵام جلوبەرگی مەدەنییان لەبەردابووە و ئۆتۆمبێلەکەشیان مەدەنی بووە، بۆیەوە لەمەودوا هەر ئۆتۆمبێلێک لە دێرەلوک-ئامێدی ئاڵای کوردستانی لەسەر نەبێت، وەک ئۆتۆمبێلی دوژمن مامەڵەی لەگەڵدا دەکەن و دەیکەنە ئامانج.
پێشتر میدیای پەکەکە بڵاویکردبووەوە ئەو چەکدارانەی لە نێو ئۆتۆمبێلەکەدا بوون، تیمێکی سەر بە میتی تورکیا بوون.
