مامۆستایان و فەرمانبەرانی ناڕازیی لە ڕێی ڕێگرتن لە تانکەرەکانی نەوتەوە داواکارییەکانیان دەگەیەنن.
بڕیارە ئەمڕۆ یەکشەممە، مامۆستایان و فەرمانبەرانی ناڕازیی لە شارۆچکەی عەربەت گردبنەوە و تێیدا جەخت لە تەوتین و خەرجکردنی مووچەی مانگی 12ی 2024 بکەنەوە.
ئامانجی گواستنەوەی چالاکییەکە ڕێگرتنە لەو تانکەرە نەوتانەی کە لە نێوان سلێمانی و ئێراندا هاتووچۆ دەکەن.
بە پێی ڕاگەیەندراوێکی مامۆستایان و فەرمانبەرانی ناڕازی، دەیانەوێت بە ڕێگرتن لە هاتووچۆی تانکەرەکان “لە گۆڕەپانەوە ئەجێندا و پیلانەکانی دەسەڵات شکست پێبێنین ئەو کاتانەی دەیانەوێت ملکەچ و سەرکوتمان بکەن؛ ئێمە خۆڕاگرانەتر و پێداگیرانەتر لە بەرامبەریان بووەستینەوە”.
لە ڕاگەیەندراوەکەدا هاتووە کە “بەنامەی فەرمیی؛ UN و دادگای باڵای فیدراڵی و ئەنجومەنی نوێنەران و وەزارەتی ناوخۆی عێراق لەم خۆپیشاندانە مەزنە ئاگادارکراونەتەوە. پاراستنی گیان و شکۆی خۆپیشاندەران، خراوەتە ئەستۆی دەسەڵاتدارانی ئەم زۆنە”.
