بەپێی پێشبینی شارەزایانی كەشناسی، تاڕۆژی سێ شەممە ئەگەرەکانی بەفر و کڕێوە و شڵێوە بەردەوامە ناو بەناو و پلەكانی گەرماش زیاتر دادەبەزن.
شاڵاو هیدایەت، شارەزای كەشناسی بۆ (خەڵك) ڕایگەیاند، بڕی بەفر 0.1 سم تا وەکو 15 سم دەبێت هەر لەناوچەی شاخاوییەوە تاوەکو ناوچەی دەشتاییەکان و زۆرینەی دەگرێتەوە زۆرترین ڕێژەش لە شاخاوییەکان دەبێت و دواتر نیمچە شاخاوی و کەمترین ڕێژە لەدەشتاییەکانی خۆرئاوا دەبێت.
ڕاشیگەیاند، پلەکانی گەرما لەسبەینێوە و ڕۆژانی تر زیاتر دادەبەزێت بەڕێژەی 4 تا 6 پلەی تر، ڕۆژانی یەک شەممە و دوو شەممە و سێ شەممە لوتکە و چەقی سەرماکەیه و تاوەکو ڕۆژانی هەینی و بۆ سەرەتای هەفتە ئەگەری شەختە و بەستن هەیە.
ڕوونیشی كردەوە، یەک شەممە و دوو شەممە و سێ شەممە بەزۆری شەوانە و بەیانیان لەهەموو ناوچەکان ئەگەری شەختە و بەستن هەیە دواتریش تا هەینی بۆ سەرەتای هەفتە لەزۆرینەی ناوچە دەمێنێت و بەکاریگەری لاواز و کەمتر.
جەختیشی كردەوە، پێشتر وتومانە نەسەرماکە و نە بەفرەکە مێژوویی و بێ وێنە نیه، بەڵکو ساڵانی پێشتر تەنانەت زیاتریش هەبووە، دوور نەڕۆین 2020 و 2022 هەبووە.
