سودانی داوادەژات کۆمپانیاکانی نەوت پەلەبکەن لە بەرهەمهێنانی نەوت و دەڵێت”دەبێت هەناردەی نەوتی هەرێم بە زویی دەستپیبکاتەوە”.
نوسینگەی سەرۆك وەزیرانی عێراق راگەیەندراوێکی لەبارەی كۆبوونەوەی محەمەد شیاع سودانی و نێچیرڤان بارزانی سەرۆکی هەرێمی کوردستان بڵاوکردەوە و تیایدا هاتووە”سەرۆك وەزیرانی عێراق جەختی كرد لەسەر گرنگیی بەردەوامبوون لەسەر جێبەجێكردنی رێككەوتنە هاوبەشەكان، بەتایبەتیش لەبەر رۆشنایی پەسەندكردنی دوایین هەمواری یاسای بودجە لە پەرلەمانی عێراق.
لە راگەیەندراوەکەدا سودانی جەختیشیكردووەتەوە، لەسەر پەلەكردنی كۆمپانیاكانی نەوت لە هەرێمی كوردستان بۆ بەرهەمهێنانی نەوت و دووبارە هەناردەكردنەوەی لەرێگەی بەندەری جەیهانی توركیاوە.
هاوکات، نێچیرڤان بارزانی دوای کۆبوونەوەکە رایگەیاند، گفتوگۆیەکی بەرهەمداریان کردووە لەبارەی دوایین پێشهاتەکان و هەناردەکردنەوەی نەوتی هەرێم بۆ عێراق و هەرێم خێری تێدایە و دەبێتە هۆی بوژانەوەی ئابوری وڵات.
ئەمڕۆ شەممە 22ـی شوبات، بە ئامادەبوونى محەمەد شیاع سودانى، سەرۆکوەزیرانى عێراق و نێچیرڤان بارزانى، سەرۆکى هەرێمى کوردستان، حەوتەمین کۆنگرەى دیالۆگى نێودەوڵەتیى بەغداد دەستی بە کارەکانی کرد، کۆنگرەکە لەژێر ناونیشانى هەماهەنگى لەپێناو گەشەپێدان و ئاسایشى هەرێمیى بەڕێوەدەچێت.
