مەرج بۆ پێدانی کۆبۆنی نوێی خۆراک ئاشکرا دەکرێت و بەڕێوەبەری گشتیی بازرگانی هەرێم دەڵێت”هەرکەس کارتی نیشطیمانی نەبێت کۆبۆنی پێنادرێت”.
نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازیی حكوومەتی هەرێم، لەبارەی پرۆسەی کارتی ئەلکترۆنی کۆبۆنی خۆراک ڕایگەیاند، لەدوای جێبەجێکردنی پرۆسەی بە ئەلیکترۆنیکردنی کۆبۆنی خۆراک، ئەوەی کارتی نیشتمانیی نەبێت، کۆبۆنی ئەلکترۆنی خۆراکی پێنادرێت و ناتوانێت بەشەخۆراکی مانگانە وەربگرێت.
ئاماژەی بەوەشدا، ئەو کۆبۆنە ئەلکترۆنییە دەچێتە ناو کۆدی کارتی نیشتمانی و بەبێ بوونی کارتی نیشتیمانی ناتوانرێت هاووڵاتی تۆماربکرێت.
ڕاشیگەیاند، زیاتر لە یەک ملیۆن و 300 هەزار خێزان لە هەرێمی کوردستان دەتوانن بەشداری لە بەئەلکترۆنیکردنی کۆبۆنی خۆراک بکەن، هاوکات زیاتر لە 5 ملیۆن کەس کە دەتوانن سوودمەندبن لە کۆبۆنی خۆراک دەبێت خاوەنی کارتی نیشتیمانی بن.
نەوزاد شێخ كامل داوای لە هاووڵاتیان كرد، هەر كەسێك تا ئێستا كارتی نیشتمانیی نییە و دەیەوێت كۆبۆنی خۆراكی بمێنێت، یان كۆبۆنی هەبێت، دەبێت كارتی نیشتمانیی دەربێنێت تا وەک تەواوی هاووڵاتیان سوودمەندبێت لە بەشە خۆراکی مانگانە.
