نێچیرڤان بارزانی، سەرۆکی هەرێمی کوردستان بە سەردانێکی فەرمی گەیشتە بەغدا و بەشداری گفتوگۆی بەغدا دەکات.
ئەمڕۆ شەممە، نێچیرڤان بارزانی، سەرۆکی هەرێمی کوردستان بە سەردانێک گەیشتە بەغدا. بەگوێرەی زانیارییەکان، لەگەڵ محەمەد شیاع سوودانی، سەرۆکوەزیرانی عێراق کۆدەبێتەوە.
ئەمڕۆ شەممە، بە ناونیشانی (پەیوەندییەکان لەپێناو گەشەپێدان و سەقامگیری هەرێمی)، پەیمانگەی عێراق بۆ دیالۆگ بەسەرپەرشتی محەمەد شیاع سودانی، سەرۆک وەزیرانی عێراق، حەوتەم گفتوگۆی نێودەوڵەتی بەغدا ڕێکدەخات کە نێچیرڤان بارزانی، سەرۆکی هەرێمی کوردستان بەشداریی تیادا دەکات و وتارێک بەبۆنەی کردنەوەی گفتوگۆکە پێشکەش دەکات.
بەپێی ئەو زانیارییانەی پەیمانگەی عێراق بۆ دیالۆگ ئاشکرای کردووە، لە حەوتەم گفتوگۆی نێودەوڵەتی بەغدا، باس لە بەرژەوەندی گەلانی ناوچەکە دەکرێت، لەگەڵ پرسی ئابووری و نەوت، بۆ قسە کردن لەسەر ئەو بابەتانەش، 100 کەسایەتی دیار لە عێراق و جیهان بەشداریی دەکەن.
