قوباد تاڵەبانی، جێگری سەرۆک وەزیرانی هەرێم لە ڕۆژی جیهانی زمانی دایکدا پەیامێکی بڵاوکردەوە و ڕایگەیاند، لەم قۆناغەدا بۆ ئەوەی بتوانین زمانەکەمان بپارێزین دەبێت گەشەی پێ بدرێت.
قوباد تاڵەبانی، ئەمڕۆ هەینی، بڵاویکردەوە: لە رۆژی جیهانی زمانی دایکدا، سەری رێز دادەنوێنین لە ئاست هەموو ئەو نووسەر و شاعیر و زمانزان و خەمخۆرانەی خزمەتی زمانی کوردییان کردوە و گەشەیان پێ داوە.
دەشڵێت: سەرباری ئەو هەموو فشار و هەڕەشەیەی لەسەر زمانەکەمان هەبووە و هەیە، ئەوان وەک پارێزەری زمانی کوردی تاڵی و شەونخونی زۆریان چەشت تا پارێزگاری لە زمانی کوردی وەک ناسنامەی نەتەوەکەمان بکەن.
باسی لەوەشکردووە: لەم قۆناغەدا بۆ ئەوەی بتوانین زمانەکەمان بپارێزین دەبێت گەشەی پێ بدرێت و پشتگیری ئەو کەسە دڵسۆز و خەمخۆرانە بکەین کە هەوڵ دەدەن زمانی کوردی لەگەڵ زانستە جۆراوجۆرەکان و گۆڕانکارییەکانی ئەم سەردەمە بگونجێنن.
“من کوردم. زمانی دایکم کوردییە”، قوباد تاڵەبانی وای نووسیوە.
