کەشناسی: لە سەنتەری شاری سلێمانی بەفر دەبارێت

کەشناسی هەرێم ڕایگەیاند، ئەمڕۆ ئاسمان هەور دەبێت، لە کاتەکانی شەو بەفر لە سەنتەری شاری سلێمانی و دەوروبەری و سەنتەری شارۆچکەی سۆران دەبارێت.

بەپێی ڕاپۆرتی کەشناسی هەرێم، ئەمڕۆ هەینی، ئاسمان هەور دەبێت، نمە بارانی پچڕپچڕ لە شوێن و ناوچە جیاجیا دەبێت، بەڵام لە ناوچەكانی پارێزگای سلێمانی و هەڵەبجە و ئیدارەی سۆران و ڕاپەڕین ڕێژەی دابارین زیاتر دەبێت و بارانی مامناوەند دەبارێت، لە ناوچە شاخاوییەكان بە تایبەت ناوچە سنووریەكان بەفر بارین دەبێت.

دەشڵێت: پێشبینی دەكرێت بۆ كاتەكانی شەو لە سەنتەری پارێزگای سلێمانی و ناوچەكانی دەوروبەری سلێمانی و سەنتەری قەزای سۆران بەفربارین هەبێت.

باسی لەوەشکردووە: پلەکانی گەرما بە نزیكەی دوو تـــــا چوار پلە نزم دەبێتەوە بەراورد بە تۆمارکراوەکانی دوێنێ، هەروەک مەوداى بینین لەنێوان (حەوت – نۆ) کیلۆمەتر دەبێتک لەکاتی بەفربارین لە ناوچە بەرزەکان کەم دەبێتەوە بۆ (چوار-شەش) کیلۆمەتر.

کەشناسی هەرێم لە بارەی کەشوهەوای سبەینێ شەممە، دەڵێت: ئاسمان بە گشتی هەور دەبێت و لە ناوچەكانی ڕۆژهەڵاتی هەرێم نمە باران و بارانی مامناوەند بە پچڕپچڕی دەبارێت هەروەها لە ناوچە شاخاوییە سنووریەكان بەفر بارین دەبێت.

دەشڵێت: پلەکانی گەرما بە نزیكەی یەک تـــــا دوو پلە نزمتردەبێت بەراورد بە تۆمارکراوەکانی ئەمرۆ.

بەرزترین پلەکانی گەرمای پێشبینیکراو بە پلەی سیلیزی:

هەولێر: 8 پلەى سیلیزى

سلێمانی: 6 پلەى سیلیزى

دهۆک: 7 پلەى سیلیزى

کەرکوک: 10 پلەى سیلیزى

زاخۆ: 7 پلەى سیلیزى

هەڵەبجە: 6 پلەى سیلیزى

حاجی ئۆمەران: -4 پلەى سیلیزى

سۆران: 2 پلەى سیلیزى

گەرمیان: 12 پلەى سیلیزى