وەزارەتی خوێندنی باڵا ناوی زیاتر لە دوو هەزار دەرچووی پزیشکی بۆ عێراق دەنێرێت بەمەبەستی دامەزراندنیان.
لەبڵاوکراوەیەکدا، وەزارەتى خوێندنى باڵا و توێژینەوەى زانستى حکومەتى هەرێمى کوردستان لەسەر داواى وەزارەتى تەندروستى حکومەتى عێراقى فیدرال و لە ڕێگەى نوێنەرایەتى حکومەتى هەرێمى کوردستان لە بەغدا، ناوى (٢٢٦٩) دەرچوى بەشە پزیشکی و تەندروستییەکان لە زانکۆکانى هەرێمى کوردستان بۆ ساڵى خوێندنى (٢٠٢٣-٢٠٢٤) کە دانیشتوى ناوچەکانى دەرەوەى ئیدارەى هەرێمى کوردستانن بەمەبەستى دامەزراندن لەسەر میلاکى وەزارەتى تەندروستى حکومەتى عێراقى، ئاراستەى نوێنەرایەتى حکومەتى هەرێمى کوردستان لە بەغدا دەکات.
بەپێی بلاوکراوەکە، نوسراوەکە بە ئیمزاى د. ئارام محمد قادر وەزیرى خوێندنى باڵا و توێژینەوەى زانستى بە ژمارە (4004) ئەمڕۆ پێنجشەممە ڕێکەوتى (2025/2/20) بە زمانى عەرەبى ئاراستەى نوێنەرایەتى حکومەتى هەرێمى کوردستان لە بەغدا کراوەو تیایدا چەندین دۆکیۆمێنت و بەڵگەنامەى فەرمى کە بریتین لە ناوى دەرچوانى بەشە پزیشکى و تەندروستییەکان و بڕیارى زانکۆیی دەرچوان لەخۆدەگرێت.
لەبڵاوکراوەکەدا هاتووە، لەڕێگەی نوێنەرایەتى حکومەتى هەرێمى کوردستانەوە لە بەغدا ئاراستەى وەزارەتى تەندروستى حکومەتى عێراقى فیدرال دەکرێت بە مەبەستى دامەزراندنیان.
