بۆ مووچەی مانگی دوو بەشێک لە مووچەخۆران قەرەبووی ئەو پارەیە دەکرێنەوە کەلەمانگی یەک لێیان بڕابوو.
هادی ئەکرەم، بەڕێوەبەری جێبەجێکار لە بەڕێوەبەرایەتی خانەنشینیی پێشمەرگە لە سلێمانی، بەمیدیای پارتی ڕاگەیاندووە، مانگی ڕابردوو لە سلێمانی 8 بۆ 9 هەزار خانەنشینی پێشمەرگە نزیکەی نیوەی مووچەکانیان لیبڕا، و بۆ ئەم مانگە کێشەکەیان چارەسەر کراوە و تەواوی مووچەکەیان وەردەگرن.
ئاماژەی بەوەشداوە، ئەو ئەفسەرەی مانگی رابردوو ئەگەر مووچەکەی ملیۆنێک دینار بووبێت و 500 هەزاری وەرگرتبێت، بۆ مانگی دوو، ملیۆنێک و 500 هەزار دینار وەردەگرێت، واتە بۆ مانگی دوو، خانەنشینانی سلێمانیش لێبڕینیان نابێت، هەروەها ئەوەی لە مووچەی مانگی یەک لێیان بڕدراوە، لە مووچەی مانگی دوو پێیان دەدرێتەوە.
جێی باسە ئەوانەی مووچەی خانەنشینیان کەمکراوەتەوە ئەوانەن کە مووچەکەیان سەر بە وەزارەتی داراییە، و هۆکارەکەش ئەوەیە وەزارەتی دارایی هەرێمی کوردستان لە دەستکاریکردنی مووچەدا نەگەڕاوەتەوە بۆ وەزارەتی پێشمەرگە.
لە هەرێمی کوردستان نزیکەی 160 هەزار خانەنشینی مەدەنی و 70 هەزار خانەنشینی سەربازی هەن و لە مانگی تەمموزی ساڵی رابردووەوە یاسای خانەنشینیی یەکگرتوو لە هەرێمی کوردستان جێبەجێ کرا، بەڵام تاوەکو مووچەی مانگی یەکی ئەمساڵ یاساکە بەسەر خانەنشینانی سەربازیدا جێبەجێ نەکرا.
