وەزارەتی پێشمەرگەی كوردستان ڕایدەگەیەنێت، كە پلانێکی تیرۆرستانی داعشی پوچەڵ كراوەتەوە و چەند شوانێك ڕزگار كراون.
وەزارەتی پێشمەرگەی كوردتان لە ڕاگەیەنراوێكدا ئاماژەی بەوەكردووە، دوای ئەوەی بەرەبەیانی ئەمڕۆ ١٩ی شوباتی ٢٠٢٥، شانەیەکی نووستوی گروپی تیرۆرستی داعش لە سنوری گوندەکانی دوزخورماتوو بە دیاریکراوی لە دەوروبەری گوندی دوراجی و غەررە، لە کردەوەیەکی ترسنۆکانەدا پەلاماری چەند شوانکارێکیان دا، لەئەنجامدا ڕووبەرووبوونەوە لە نێوانیان دروستبووە.
ڕاشیگەیاندووە، دوای ئاگادارکردنەوەی هێزی پێشمەرگەی کوردستان لەو سنوورە دەست بەجێ هێزێکی پێشمەرگەی کوردستان بەمەبەستی بە هاناوەچوونی شوانەکان و خەڵکی ناوچەکە ڕوویان لە شوێنی رووبەڕووبوونەوەکە کرد و توانرا شوانەکان بە سەلامەتی بگەڕێندرێنەوە بۆ ناوچەکانی خۆیان و تیرۆرستەکانیش بۆ شوێنی نادیار هەڵهاتن.
هێزی پێشمەرگەی کوردستان، دڵنیایی دەدات کە “پێشمەرگە هەمیشە چاوکراوەیە و بە ورە و دەستێکی پۆڵاین رووبەڕووی هەموو جولە و کردوەیەکی تیرۆرستانی داعش دەوستێتەوە”.
