سبەینێ پێنج شەممە بەئامادەبوونی عەلی عەلاق، پارێزگاری بانکی ناوەندی عێراق لە باڵەخانەی سیتی سەنتەر لە سلێمانی “ناوەندی نێودەوڵەتی بۆ دارایی و بازرگانی” دەكرێتەوە بە چاودێری بانكی ناوەندی و هەر لەو باڵەخانەیەدا ئۆفیسی بانكەكانی (ڕەشید، ڕافیدەین) دەکرێنەوە .
باڵەخانەی سیتی سەنتەر لە سلێمانی دەکەوێتە سەر شەقامی بازنەیی مەلیك مەحمود (60 مەتری) نزیک مزگەوتی ئەحمەدی حاجی عەلی.
د. هەڤاڵ ئەبوبەکر، پارێزگاری سلێمانی بە (خەڵك)ی ڕاگەیاند: سبەینێ پێنج شەممە، بە ئامادەبوونی عەلی عەلاق، پارێزگاری بانکی ناوەندی عێراق، لە سیتی سەنتەر لە سەرچنار، ناوەندی نێودەوڵەتی بۆ دارایی و بازرگانی دەکرێتەوە.
لای خۆشیەوە، مامۆستا دڵشاد میرانی، ڕوونکردنەوەیەکی لەسەر کردنەوەی لقی بانکی ڕەشید و ڕافیدەن لە سلێمانی بڵاوکردەوە و ڕایگەیاند، سبەینێ لەسەر بانگهێشتنامەی فەرمی پارێزگاری بانكی ناوەندی ئامادەی كردنەوەی ناوەندی نێودەوڵەتی بۆ دارایی و بازرگانی دەبین و هەر لەوێ ئۆفیسی بانكەكانی (ڕەشید و ڕافیدەین) دەكرێنەوە.
ڕاشیگەیاند، ئەو ئۆفیسانە كارە یاسایی و كارگێڕییەكانی تەواو دەكات بۆ كردنەوەی لقی بانكەكانی ڕەشید و ڕافیدەین لە ماوەی داهاتوودا، كە هیوادارین دوو مانگ زیاتر نەخایەنێت.
هاوكات، گوڵاڵە سدیق، مامۆستای زانكۆ و شارەزای ئابووری و بانك ڕایگەیاند، سبەی سەنتەرێکی گەورە و گرنگی دارایی لە سلێمانی دەکرێتەوە، کەجێی دەستخۆشی و دڵخۆشییە، لەو سەنتەرەدا ئۆفیسی بانکەکانی ڕەشید و ڕافیدەین دەکرێتەوە، کە ئەمە سەرەتایەکەی زۆر باشە بۆ کردنەوەی لقی ئەو بانکانە لە داهاتویەکی نزیکدا.
وتیشی، “گرنگی کردنەوەی ئەم سەنتەرە ئەوەیە جوڵەی بازرگانی باش دەکات لە سلێمانی و هاووڵاتیان دەتوانن سوودمەندبن لە پێشینە و قەرزە بانکییەکان”.
ئاماژەی بەوەشكرد، بڕیارە نوێیەکەی دادگای فیدراڵی عێراق سەبارەت بە تەوتین، هەمان دەقی ڕوونکردنەوەکەی ٣/٧/٢٠٢٤ هەمان دادگایە. بەیەک وشە باسی هەژماری من نەکراوە، بەڵکو بانکەکانی (هەژماری من) ی وەک تەوتین ناوهێناوە. تەنها ئەوە زیادکراوە، کەدەڵێت بە هەمەئاهەنگی لەگەڵ حکومەتی هەرێم، بۆیە دەبێت چاوەڕوان بین بزانین لەکۆتاییدا کێ تەمویلی ئەو بانکانە دەکات، چونکە تەنها بە تەمویلەکە دەزانین کام لایان جێبەجێ بووە.
