بەڕێوەبەرایەتی ئاسایشی سۆران دەستگیرکردنی دوو تۆمەتباری ڕاگەیاند و دەڵێت”وێنەو ڤیدیۆیان بردووە و هەڕەشی بڵاوکردنەوەیان کردووە”.
لە بەڕێوەبەرایەتی ئاسایشی سۆران لە ڕاگەیەندراوێکدا ڕایگەیاند، دوو تۆمەتبار لەسەر خراپ بەکارهێنانی تۆڕە کۆمەڵایەتییەکان دەستگیر کران.
ئاماژەی بەوەشداوە، بەرێوەبەرایەتی ئاسایشی قەزای خەلیفان، سەر بە بەڕێوەبەرابەتی ئاسایشی سۆران، دوای بەدواداچوون وچاودێری کردن لەسەر سکاڵای هاووڵاتیان، توانیان لەرێکەوتی ٢٠٢٥/٢/١٧، دوو تۆمەتبار دەستگیر بکەن بە ناوەکانی (ا،ن،ه)و(ز،ص،ن)، کە تۆمەتبارن بە پێی ماددەی(٢) لە یاسای قەدەغەکردنی خراپ بەکارهێنانی ئامێرەکانی پەیوەندی کردن.
ڕاشیگەیاند، ناوبراوان هەڵساون بە هاککردنی زیاتر لە (٢٠) ئەکاونت و بردنی وێنە و ڤیدیۆکانیان و دواتر هەڕەشەی بەکاهێنانیان لەدژیان لەرێگەی سناپ چاتەوە، ئەگەر بڕی١٠٠٠٠ (دە هەزار) دۆلاریان پێنەدرێت، و تۆمەتباران رێکاری یاساییان بەرامبەر گیراوەتەبەر و پەڕاوی لێکۆڵینەوەیان بۆ کراوەتەوە و رووبەڕووی دادگا کراونەتەوە.
بەڕێوەبەرایەتییەکە داوا لە هاووڵاتیانیش دەکات، هەر کەسێک سکاڵای یاسایی هەیە لەسەر هەر دوو پەیجی فەیسبووکی (دیڤان کەرکوکی) و سناپ چاتی (لولە 0101) دەتوانێت سەردانی بنکەکانی ئاسایش بکات.
