هەسەد و مەسەد و ئیدارەی خۆسەر دیدگایەكی هاوبەش لەبارەی ئایندەی سوریا گەڵاڵە دەكەن و “ڕازیبون بە تێكەڵكردنی هەسەدە لەناو سوپای سووریا و گەڕانەوەی دامودەزگاكانی حكومەت بۆ ناوچەكانیان”.
بەپێی ڕاپۆرتێك، كە كەناڵی (الحدپ) بڵاویكردەوە، لە کاتێکدا هێشتا دانوستان لە نێوان هێزەکانی سوریای دیموکرات و ئیدارەی سیاسی نوێی دیمەشق بەردەوامە، بەمەبەستی گەیشتن بە چارەسەرێک کە هەردوولا پێی ڕازیبن، ئەمڕۆ سێ شەممە کۆبونەوەی سێ قۆڵی نێوان هێزەکانی سوریای دیموکرات (هەسەدە) و ئەنجوومەنی سوریای دیموکرات (مەسەدە) و ئیدارەی خۆسەر لە باکوری ڕۆژهەڵاتی سووریا ئەنجامجدرا و دیدگایەکی یەکگرتوو لەبارەی ئایندەی ئەو وڵاتە گەڵاڵەكراوە.
بەپێی ڕاپۆرتەكە، ئامادەبووان لەسەر خاڵە گرنگەکان کۆک بوون، کە بنەمای مامەڵەکردن لەگەڵ دیمەشق پێکدەهێنن، هاوكات ڕێککەوتن كراوە لەسەر ئەوەی هێزەکانی هەسەدە تێكەڵاوی سوپای نوێی سووریا بكرێن، لەگەڵ گەڕاندنەوەی دامودەزگاکانی حکومەت بۆ ناوچەکانی ژێر دەسەڵاتی ئیدارەی خۆسەری.
لە کۆبوونەوەکەدا داوا ئەحمەد شەرع، سەرۆک کۆماری قۆناغی ڕاگوزەری سووریا کراوە، سەردانی باکوری ڕۆژهەڵاتی وڵات بکات و ئاستی هەماهەنگی نێوان هەردوولا بەرز بکاتەوە و ئاوارەکان لە هەموو کەمپەکانەوە بۆ شار و ناوچەکان و گوندەکانیان بگەڕێننەوە.
ئەمە لەكاتێكدایە، كە مەزڵوم عەبدی، فەرماندەی هێزەکانی سوریای دیموکرات “هەسەدە”، لەمیانی چاوپێکەوتنێکدا لەگەڵ ڕۆژنامەی (تایمز)ی بەریتانی ڕایگەیاند، پیرۆزبایی لە ئەحمەد شەرع دەكەین بۆ وەرگرتنی پۆستی سەرۆكایەتی و بانگهێشتی دەكەین بۆ باكووری ڕۆژهەلاتی سووریا.
مەزڵوم عەبدی ڕاشیگەیاندووە، دەبێت ئیدارەی نوێی سووریا کاربکات بۆ گەیشتن بە گشتگیری، لەگەڵ گرنگیدان بە جێبەجێکردنی داواکارییە نێودەوڵەتییەکانی پەیوەست بە نوێنەرایەتیکردنی کەمینەکان.
