بریكاری وەزارەتی دارایی عێراق ڕایدەگەیەنێت، یەکنەبوونی نێو ماڵی کورد بەتایبەت بەرامبەر بەغدا وایکردووە هەر رۆژە و بە ناوی دۆسییەکەوە کێشە بۆ نەتەوەی کورد دروست بكەن و دەشڵێت: چیتر مایەی قبوڵکردن نییە خەڵکی کوردستان مووچەی دوا بخرێت بەناوی کێشەی تەکنیکی و هونەری کە لە بنەڕەتدا ھەمووی سیاسی بوو.
ڕێباز حەملان، بریكاری وەزارەتی دارایی عێراق لە هەژماری خۆی لە فەیسبووك بڵاویكردۆتەوە، بابەتی مووچە و بودجە، جێبەجێنەکردنی رێککەوتننامەی شنگال، جێبەجێنەکردنی ماددەی 140 و جێبەجێنەکردنی بڕیارەکانی دادگا لەسەر زەوییە داگیرکراوەکانی ناوچەکانی دەرەوەی ئیدارەی هەرێم، بابەتی مامۆستایانی کورد لە کەرکووک و جێبەجێنەکردنی بڕیارەکانی دادگای فیدراڵی کە لە بەرژەوەندی هەرێمە. هەموو ئەم کێشە هەڵپەسێردراونە کە بەردەوام دووبارە و 100بارە دەبنەوە و دەبێت چاوەڕوانی پێشهاتی تریش بین.
ڕاشیگەیاند، ئەو كێشانە ھۆکارەکەی ئەوەیە کە بەشێک لەو عەقڵیەتەی باڵادەستە لە بەڕێوەبردنی دەوڵەتی عێراق، هەر ھەمان عەقڵیەتی مەرکەزییەتی خۆسەپێنەری ھەیە، کە دانپێدانەنانە بە مافەکانی گەلی کورد و چاویان ئەو دەستوورەش نابینێ کە خۆیان دەنگیان پێداوە، ئەو هەستە پڕ لە قینەی ھەندێک لایەن و کەسی باڵا دەست ھەیانە کە ناتوانن ئەو ئاوەدانی و ئەو پێشکەوتنەی کە هەرێمی کوردستان لە حوکمڕانی خۆیدا کردی، ئەوان پێیان نەکرا بە فرۆشتنی ملیۆنان بەرمیل نەوت ڕۆژانە نەیانتوانی ژیانی خەڵکەکەیان لە باشوور و ناوەڕاست ببەنە ئاستێکی خۆشگوزەران و شیاو و ئارام.
دەشڵێت: ئەوەی جێگای داخە یەکنەبوونی نێو ماڵی کورد بەتایبەت بەرامبەر بەغدا و نەبوونی یەک ھەڵوێستی نوێنەرانی کورد لە بەغدا، لە بەرامبەر رەفتارە جۆراوجۆرەکانی مامەڵەی عێراق لەسەر هەموو پرسەکان، کە بەرامبەر هەرێم دەکرێت وایکردووە هەر رۆژە و بە ناوی دۆسییەکەوە کێشە بۆ نەتەوەی کورد دروست بکەن، لە ناو هەرێم و لە ناوچە کوردییەکانی دەرەوەی هەرێم کە دەبێت نوێنەرانی کورد لە بەغداد ببنە دەنگێکی بەرز و بە بیرێکی نەتەوەییانە کار بۆ چارەسەری ریشەیی هەموو پرسەکان بکەن .
ئاماژەی بەوەشكردووە، “سوپاس بۆ خوا سەرۆک مەسعود بارزانیمان هەیە کە وەک قەڵایەک بەرامبەر پێشێلکارییەکانیان وەستاوە بۆ ئەوەی لەمە خراپترمان پێ نەکەن، بە یار و نەیارەوە لە بەردەم ھەڵوێستەکانی و پەیامەکانی کە ئەگەر بە باشی پێیان بگات هەڵوەستە دەکەن خێرا بڕیارەکانیان دەگۆڕن یان ڕایدەگرن”.
ڕێباز حەملان وتوشیەتی، “ئەوەی بۆ ساڵی 2025یش لەسەر مووچە کە ڕێکكەوتن کرا ئەو پەیام و ھەڵوێست وەرگرتنەی جەنابی بارزانی و پێداگیری جەنابی سەرۆک وەزیرانی ھەرێم بوو کە زۆر بە راشکاوانە گەیاندرایە ئەنجومەنی وەزیرانی عێراق ، کە بۆ ئەم ساڵی 2025 چیتر مایەی قبوڵکردن نییە خەڵکی کوردستان مووچەی دوا بخرێت بەناوی کێشەی تەکنیکی و هونەری کە لە بنەڕەتدا ھەمووی سیاسی بوو”.
