بەرپرسێكی خانەنشینیی پێشمەرگە ئاشكرایدەكات، ئەوانەی لە چەند مانگی رابردوودا مووچەكانیان خراوەتە سەر خانەنشینیی پێشمەرگە و مووچەیان پێ نەدراوە، دەشڵێت: “ئەوەی لە 1ی1ی2025 خانەنشین دەكرێت، مووچەی هاوتا دەكرێ و پاداشتی كۆتایی خزمەت لە بەغدا وەردەگرێت”.
حاجی مەلا ئەمین، بەڕێوەبەری گشتیی خانەنشینی و كەمئەندامی لە وەزارەتی پێشمەرگە بە میدیای پارتی ڕاگەیاند: “ئەو پێشمەرگانەی خانەشینیی یەكەی 70 و 80، كە لەكۆتایی ساڵی رابردوودا خانەنشین بوون و مووچەیان وەرنەگرتووە، بڕیارە لە مانگی دوو مووچەكانیان وەربگرن و هەمووی داخیلی لیستی مووچە كراون”.
سەبارەت بەو خانەنشینانەی یەكەی 70 و 80، كە مووچەی مانگی یەكیان وەرنەگرتووە، بەڕێوەبەری گشتیی خانەنشینیی پێشمەرگە وتی: “ئەوانە دۆسییەكانیان دەگوازرێتەوە بۆ سەر وەزارەتی دارایی، چونكە ئەوە بڕیاری پێ دراوە، بۆیە مووچەی مانگی یەكیان وەرنەگرتووە، بۆ ئەوەی رێكارەكانی گواستنەوەی دۆسییەكانیان تەواو بكرێت، رۆژانە ئێمە دۆسییەكانیان تەواو دەكەین”.
حاجی مەلا ئەمین، ئاشكراشی كرد: “تەنیا لە یەكەی 80ی پێشمەرگە زیاتر لە هەشت هەزار خانەنشین مووچەی مانگی یەكیان وەرنەگرتووە، ئەوانە مووچەكانیان نافەوتێت، بەڵام رێكاری تایبەتی خۆی هەیە و هەوڵ دەدەین زوو تەواو بكرێت و هەموو مووچەكانیان بدرێت، ئێمە حەز ناكەین مووچەی كەسیان دوا بكەوێت”.
باسی لەوەش كرد: “بەشێكی خانەشینانی پێشمەرگە بەهۆی هاوتاكردنی مووچەكانیان لەگەڵ خانەشینانی عێراق، مووچەكانیان زۆر كەمی كردووە، بۆیە یاداشتێكمان داوەتە وەزیری پێشمەرگە، بۆ ئەوەی ئەو پرسە لە ئەنجومەنی وەزیران چارەسەر بكرێت”.
ئەو بەرپرسەی خانەنشینیی پێشمەرگە ئەوەشی خستەڕوو: “ئەو پێشمەرگانەی لە مانگی یەکی ئەمساڵەوە خانەنشین كراون، یان خانەنشین دەكرێن، پاداشتی كۆتایی خزمەتیان لە بەغداوە خەرج دەكرێت، بەڵام ئەوانەی تا 31ی 12ی 2024، خانەنشین بوون، ئەوە پاداشتی كۆتایی خزمەتیان لە دارایی هەرێمی كوردستان وەردەگرن”.
پاداشتی کۆتایی خزمەت كۆكراوەی دوا مووچەیە بۆ ساڵێك و شەش مانگ بۆ پێشمەرگە خەرج دەكرێت.
سەرچاوەیەكی ئاگادار لە وەزارەتی دارایی رایگەیاند: “گرفتی دابەشنەكردنی مووچەی بەشێك لە خانەنشینانی پێشمەرگە لە مانگی یەك بۆ ئەوە دەگەڕێتەوە، كە وەزارەتی دارایی هەرێمی كوردستان لەگەڵ بەڕێوەبەرایەتیی گشتیی خانەنشینیی پێشمەرگە سەرقاڵی گواستنەوەی دۆسیەی سەرجەم خانەنشینانی یەكەی 70 و 80یە بۆ سەر بەڕێوەبەرایەتیی خانەنشینی پێشمەرگە، لەوێشەوە بۆ وەزارەتی دارایی”.
ئاماژەی بەوەشدا: “مووچەی خانەنشینیی یەكەی 70 و 80، نامێنێت، بەڵكو سەرجەمیان دەخرێنە سەر خانەنشینیی پێشمەرگە، لەگەڵ دابەشكردنی مووچەی خانەنشینیی پێشمەرگە ئەوانیش مووچەكانیان لە بانك و لە رێگەی (هەژماری من)ەوە وەردەگرن، مووچەكانیشیان بەپێی یاسای خانەنشینیی یەكگرتووی عێراق دەبێت، كە لە هەرێمی كوردستان و عێراق كاری پێدەكرێت”.
