محەمەد شیاع سودانی لیژنەیەکی بۆ لێکۆڵینەوە لە ڕووداوەکەی دوێنێی سەرگەڕان پێکهێنا و فەرماندەیی ئۆپەراسیۆنە هاوبەشەکانیش داوای لە سوپا و پێشمەرگە و حەشد دەکات پابەندبن بە یاسا و ڕێنماییەکان و نیشتمانییانە مامەڵە بکەن.
ئەمڕۆ سێشەممە، شانەی ڕاگەیاندنی ئەمنیی بڵاویکردەوە، محەمەد شیاع سوودانی، فەرماندەیی گشتی هێزە چەکدارەکان بەدواداچوونی بۆ ئەو ڕووداوە کرد کە دوێنێ لە دەوروبەری پارێزگای کەرکووک ڕوویدا، دوای ئەوەی ڕێگری لە جووتیاران کرا کاری خۆیان بکەن.
ڕوونیشیکردەوە کە سوودانی، فەرماندەیی ئۆپەراسیۆنە هاوبەشەکانی ڕاسپارد بۆ پێکهێنانی لیژنەیەکی باڵای لێکۆڵینەوە کە نوێنەرایەتی هەموو لایەنەکان بکات بۆ بەدواداچوونی ڕووداوەکە.
لە ڕاگەیەندراوەکەدا هاتووە، سوودانی، بریکاری وەزیری داد دەنێرێتە پارێزگاری کەرکوک بۆ گرتنەبەری ڕێوشوێنی پێویست سەبارەت بەو زەویانەی کە جێی بایەخی هاوبەشی نێوان حکومەتی فیدراڵی و هەرێمی کوردستانن.
لە ڕاگەیەندراوەکەدا هاتووە کە داوا لە سوپا، وەزارەتی ناوخۆ، پێشمەرگە، حەشد، دەزگا ئەمنییەکان و هەواڵگریی دەکەین پابەندبن بە یاسا و ڕێنماییەکان و خۆکۆنترۆڵکردن و مامەڵەی ژیرانە و نیشتمانییانە بۆ پووچەلکردنەوە دەرفەتی ئەو کەسانەی دەیانەوێت لە ئاوی لێڵدا ڕاو بکەن.
شانەی ڕاگەیاندنی ئەمنی ڕاشیگەیاند، داوا لە هەموو لایەن و هێزە سیاسییەکان دەکەین کە ژیرانە و بە هێمنی مامەڵە بکەن و بەرژەوەندییە باڵا نەتەوەییەکان زاڵ بکەن و پابەند بن بە یاسا و دەستوور و پاڵپشتیکردنی هێزە ئەمنییەکان بۆ پاراستنی دەستکەوتە ئەمنییەکان و ئامانجە نیشتمانییە هاوبەشەکان.
