سەرۆکی پارتی دەستخۆشی لەو جوتیارانەی کەرکووک دەکات کە ڕووبەڕووی سوپای عێراق بوونەوە و داواش لە سەرۆک وەزیرانی عێراق دەکات ڕێگریی لە دووبارەبوونەوەی ئەو ستەمە بکات کە لە جوتیاران کرا.
ئەمشەو مەسعود بارزانی، سەرۆکی پارتی دیموکراتی کوردستان دەربارەی ڕێگریی و پەلامارەکانی سوپای عێراق لە دژی جوتیارانی کورد لە سەرگەڕان پەیامێکی بڵاوکردەوە و ڕایگەیاند، دیمەنی ئازاردانی جوتیارێكی كورد و ڕەفتاری نابەجێی ڕێگریكردن لە جووتیارانی كورد كە بچنەوە سەر زەوییەكانیان، دیمەنی ئەنفال و كیمیاباران و جینۆسایدی ڕۆڵەكانی گەلەكەمان لە سەددەی پێشوو بەبیر دەهێنێتەوە. ئەمە ڕەفتارێكی شۆڤینیانە و بێویژدانانە و تاوانە لەدژی جووتیارە بێتاوانەكانی كورد لە پارێزگای كەركووك دەكرێت كە تەنیا تاوانیان ئەوەیە كوردن و خاوەنی ڕەسەنی زەوییەكانیانن.
وتیشی: “لێرەدا داوا لە بەڕێز محەمەد شیاع سوودانی سەرۆك وەزیرانی عێراقی فیدڕاڵ دەكەم ڕێگری لە دووبارەبوونەوەی ئەو زوڵمە بكرێت و ئەنجامدەرانی ئەو تاوانە دەستگیر بكرێن و سزای یاسایی خۆیان وەربگرن”.
مەسعود بارزانی لە پەیامەکەیدا دەڵێت: “دەستخۆشیش لەو كوردە قارەمانانە دەكەم كە لەبەرانبەر ئەو ستەم و دەستدرێژییە خۆڕاگر بوونە و با باش بزانن كە ئەوان تەنیا و بێ پشت و پەنا نین و بە هەموو هێزێك پشتیوانی لە خۆڕاگری و ماف و داواكانیان دەكەین”.
ئەمڕۆ سەربازانی سوپای عێراق پەلامای جوتیارانی کوردیان دا کە بەمەبەستی کێڵانی زەوییەکانیان گەڕابوونەوە بۆ سەرگەڕان.
