شارەزایەكی كەشناسی ڕایدەگەیەنێت، كە شەپۆلێكی باران و بەفری بەهێز ناوچەكانی هەرێم دەگرێتەوە و لە بەشێكی ناوچەكان نزیكەی 100 ملم باران دەبارێت و دەشڵێت: ئەو دەنگۆیانەی باسی سەرما و بەفری مێژوویی دەکەن هیچ بنەمایەكیان نییە.
شاڵاو هیدایەت، شارەزای كەشناسی بۆ (خەڵك) ڕایگەیاند، زۆرترین بڕی باران دەچێتە سەرووی 100 ملم له ناو ناوچەی شاخاوی و نیمچە شاخاوی دەبێت و ڕێژەکە کەمترین ڕێژە بەر ناوچەکانی خۆرئاوا و دەشتاییەکانی گەرمیان و هەولێر دەکەوێت 30 تا 40 ملم دەبێت و بەفرێکی باشیش لەتەواوی ناوچە شاخاوییەکان دەبارێت.
ڕاشیگەیاند، بۆ ناوچە نزماییەکان تا ئێستا جێگیر نەبووە بەفر، بەڵام سەرمای زستانی ڕاستەقینەیشی لەگەڵ دەبێت بەتایبەت لەناو هەفتەی تردا بۆ تەواوی ناوچە.
ئاماژەی بەوەشكرد، شەپۆلێکی درێژ خایەنی باران بارین سەرجەم ناوچەکان دەگرێتەوە و بەفر بارینی باشیش سەرجەم ناوچە شاخاوییەکان دەگرێتەوە لەگەڵیدا سەرمایەکی ڕاستە قینەی زستانی لەگەڵی دەبێت، بەڵام سەرماو بەفرەکە وەک ساڵی 2022 نابێت و بەفریش بۆ ناو نزماییەکان تا ئێستا جێگیر نەبووە.
دەشڵێت: ئەم سیستەمە لە 19 ی مانگ و بەولاوە دەست پێدەکات و چەند ڕۆژێک دەمێنێتەوە، ئەو دەنگۆیانەی باسی سەرما و بەفری مێژوویی دەکەن هیچ بنەمایەكی نییه و هەرچۆنێک بێت وەک ئەوەی ساڵی 2022 نابێت و لەچەند ساڵی پێشتردا هەبووه.
