سەرۆکی حکومەتی هەرێم لەبارەی ڕیگریکردن لە جوتیارانی کورد لە سەرگەران دەڵێت” ئەم هەڵسوکەوتانەی سوپای عێراق، پێچەوانەی دەستوور و ئەو بنەمایانەیە کە عێراقی نوێی لەسەر بنیات نراوە”.
نوسیبگەی سەرۆک وەزیرانی هەرێم، لە ڕاگەیەندراوێکدا ڕایگەیاند، ئەمڕۆ سوپای عێراق بۆ جارێکی تر لە دەوروبەری کەرکووک و بە تایبەتی گوندی شەناغە و چوار گوندی دیکەی سەر بە شارەدێی سەرگەڕان لە پارێزگای کەرکووک، رێگری لە جوتیارانی کورد کرد بچنە سەر زەوییەکانیان، و زەوییەکانیان بکێڵن.
لەڕاگەیەندراوەکەدا هاتووە، ئەم هەڵسوکەوتانەی سوپای عێراق کە بەرامبەر جوتیاران کرا، پێچەوانەی دەستوور و ئەو بنەمایانەیە کە عێراقی نوێی لەسەر بنیات نراوە، چونکە بەکارهێنانی سوپا بۆ ئەم مەبەستانە، پێچەوانەی یاسا و دەستوورە و پێویستە هەرچی زووتر، ئەم هەڵسوکەوتانە کۆتایی پێ بهێنرێت بەر لەوەی لێکەوتەی نەخوازراوی لێ بکەوێتەوە.
هاوکات هەر لە ڕاگەیەندراوەکەدا ئاماژە بەوەکراوە، بەرەوپێشچوون هەبووە بۆ نەهێشتنی شوێنەواری بڕیارەکانی ڕژێمی بەعسی پێشوو لە گۆڕینی دیموگرافیی ناوچە کوردستانییەکانی دەرەوەی ئیدارەی هەرێم و دەستبەسەرداگرتنی زەوی و موڵکی خەلکی رەسەنی ناوچەکە، و هاوکات پەرلەمانی عێراقیش لەمانگی ڕابردوودا پڕۆژە یاسایەکی تایبەت بە گەڕاندنەوەی زەویوزاری بۆ خاوەنە رەسەنەکانیان پەسند کرد.
ئەمڕۆ دووشەممە، 17-2-2025، لە سنووری سەرگەڕان لە پارێزگای کەرکووک جووتیارانی کورد ویستیان زەوییەکانیان بکێڵن، بەڵام سوپای عێراق و ژمارەیەک لە هێزی چالاکییە مەدەنییەکان رێگرییان لێ کردن، و گرژی لەنێوانیاندا دروستبوو، هاوکات بەشێک لە سەربازانی سوپای عێراق توندوتیژییان بەرامبەر چەند جوتیارێک بەکارهێنا و بەپێی وتەی ئەوانیش سکاڵا لەسەر ئەو کەسانە تۆماردەکەن.
