جێگری سەرۆكی پەرلەمانی عێراق لە پشكی كورد ڕایدەگەیەنێت، لەگەڵ سەرۆک وەزیرانی عێراق پەیوەندییەکمان ئەنجامدا و بەڵێنی دا دەستوەردان بكات و كۆتایی بە ڕێگری بەردەم جوتیارانی كەركوك بهێنرێت.
هێزێکی سوپای عێراق بە کەلوپەل و ئۆتۆمبێلی سەربازییەوە هەڵیکوتایە سەر زەوییە کشتوکاڵییەکانی گوندی شەناغە لە ناحیەی سەرگەڕان و ناهێڵن جوتیاران كار لە زەوییەكانیان بكەن.
شاخەوان عەبدوڵا، جێگری سەرۆكی پەرلەمانی عێراق لە هەژماری خۆی لە فەیسبووك بڵاویكردەوە، ئەمڕۆ دوو ڕووداو ڕوویانداوە، كە یەکەمیان گرژییەکانی سنوری سەرگەران و بەردەوامی رێگرییەکانی سوپا لەجوتیارە کوردەکان بۆ ئەو مەبەستە لەگەل سەرۆک وەزیران محەمەد شیاع سودانی قسەم کرد و دۆخی سنورەکەم لەگەل باسکرد و داوام کرد کۆتایی بەو ڕێگریانە بهێنێت.
دەشڵێت: بەسوپاسەوە فەریق عەبدولکەریم سودانی، راوێژکاری سەربازی ڕاسپارد بۆ ئەوەی کۆتایی بەو کێشە و گرفتانە بهێنیت ، دواتریش لەگەڵ فەریق عەبدولكەریم قسەم کرد و بەڵینیدا بەپەلە دەستوەردان بکات.
ئاماژەی بەوەشكرد، بابەتی دووەم، بەداخەوە پۆستی بەڕێوەبەری گشتی کشتوکاڵی کەرکوک درایە پەرلەمانتار وەسفی عاصی و کەسێک دانرا، کەتەنانەت وەسفی وەزیفیشی لەگەڵ پۆستەکەی ناگونجێت، ئەمە لاکاتێکدا هەفتەی ڕابردوو لەگەل کاک ریبوار قسەم کرد و بەڵێنیدا ئەو بابەتە ڕابگریت و تەنانەت وتی: ئەو کاندیدەم ڕەتکردوەتەوە.
