بەرپرسی ئۆفیسی سلێمانی کۆمسیۆنی باڵای سەربەخۆی هەڵبژاردنەكانی عێراق ڕایدەگەیەنێت، لەم هەفتەیەدا پارەی كارمەندانی سەر سندوقی هەڵبژاردنی پەرلەمانی كوردستان خەرج دەكرێت.
ئامانج عەزیز، بەرپرسی ئۆفیسی سلێمانی کۆمسیۆنی هەڵبژاردنەکانی عێراق بۆ (خەڵك) ڕایگەیاند، گفتوگۆمان لەگەڵ بەغداد کردووە و بڕیارە سبەینێ ڕەزامەندی لەسەر خەرجکردنی پارەی کارمەندانی سەر سندوقی هەڵبژاردنەكان وەربگرین و دواتر دەست بە دابەشكردنی پارەكە دەكەین.
ڕاشیگەیاند، هەوڵدەدەین لە ناوەڕاستی ئەم هەفتەیەدا دەست بە پڕۆسەی دابەشکردنی پارەی كارمەندانی كۆمسیۆن بۆ سەر سندوقی هەڵبژاردن بکەین.
ئاشكراشی كرد، ئەو کارمەندانەی فەرمانبەری حکومەتن بڕی 150 هەزار دینار وەردەگرن و ئەوانەی دەرچووی زانکۆ و پەیمانگەکانن بڕی 250 هەزار دینار وەردەگرن، بەڵام ئەوانەی كارمەندی یەدەگ بوون بۆ فەرمانبەرانی یەدەگ بڕی 50 هەزار و بۆ دەرچووانی زانكۆ و پەیمانگاكان، كە یەدەگ بوون بڕی 100 هەزار دیناریان پێ دەدرێت.
