شوێنی دەستشۆردنی نەخۆشخانەکان مەترسیدارن

نیگەرانییەکان سەبارەت گەشەی بەکتریاکان و گواستنەوەیان بۆ نەخۆش لەنەخۆشخانەکاندا بۆتەجێی نیگەرانی لەسەرانسەری جیهاندا، و هۆشداری لە زیادبوونی گەشەی بەکتریا کوشندەکانی لێدرا.

تەنها لە ئەمریکا ساڵانە نزیکەی 90 هەزار کەس بەو جۆرە بەکتریا گوازراو و گۆڕاوانە دەمرن، هەروەها بەشدارە لە زیاتر لە 3.5 ملیۆن حاڵەتی تووشبوونی نوێ لە یەکێتی ئەوروپا.

لە توێژینەوەیەکی نوێدا کە لە ڕۆژنامەی Frontiers in Microbiology بڵاوکراوەتەوە، کە لە نەخۆشخانەیەکی زانکۆی مۆدێرن لە دوورگەی مایۆرکای ئیسپانیا ئەنجامدراوە، توێژەر دکتۆر مارگاریتا جومیلا و تیمەکەی پشتڕاستی دەکەنەوە کە ئاوەڕۆی سینکی نەخۆشخانەکان دەتوانێت ببێتە شوێنێکی زاوزێی بەکتریا کە بە تێپەڕبوونی کات گەشە دەکات و دەگۆڕێت.

جومیلا دەڵێت “ئەم ئەنجامانە ئەوە دەردەخەن کە کۆنترۆڵکردنی گەشەی بەکتریا لە ئاوەڕۆکان و ڕێگریکردن لە بڵاوبوونەوەی جۆرە نوێیەکان لەم ناوچانەی کە پاکژکردنەوەیان قورسە، کێشەیەکی جیهانییە”.

توێژینەوەکە لەسەر 5 بەشی جیاواز لە نەخۆشخانەکەدا بووە، لەوانە چاودێری چڕ، بەشی پزیشکی گشتی، تاقیگەی مایکرۆبایۆلۆجی و بەشەکانی دیکە، کە لە نێوان مانگی شوباتی 2022 و شوباتی 2023دا نمونە لە ئاوەڕۆی حەوزەکان وەرگیراوە.

توێژەران 67 جۆری جیاوازی بەکتریایان دۆزیوەتەوە، لەوانە Pseudomonas aeruginosa کە ناسراوە بە هەوکردنی سییەکانی پەیوەست بە هەناسەدان و بەکتریای سپێسیس.

هەروەها توێژینەوەکە پشتڕاستی کردەوە کە بەکتریا گەشەسەندووەکانی ناو ئاوەڕۆکان لەوانەیە لە نەخۆشەکان یان کارمەندانی پزیشکییەوە بگوازرێنەوە، ئاماژە بەوە دەکات کە لەوانەیە مەترسییەکی گەورە بۆ ئەو نەخۆشانە دروست بکات کە بەرگریان لاوازە.

لە نێو ئەو بەکتریایانەی کە دۆزراونەتەوە، جۆرەکانی بەرگری دژە زیندەیی کلیبسیێلا، ئەنتێرۆباکتێر و سۆدۆمۆناس ئایرۆجینۆسا دۆزرایەوە، هەروەها جینەکانی بەرگری دژە زیندەیی وەک blaVIM لە هەندێک لە نمونەکانی سۆدۆمۆناسدا دۆزرانەوە، ئەمەش نیگەرانییەکانی لەبارەی بڵاوبوونەوەی بەکتریا بەرگریکارەکانەوە دروستکرد.

بەم پێیە، توێژینەوەکە جەخت لەسەر گرنگی جێبەجێکردنی پرۆتۆکۆڵە توندەکانی پاککردنەوە دەکاتەوە بە شێوەیەکی بەردەوام لە نەخۆشخانەکان، بەتایبەتی لە بەشە دابڕاوەکاندا، بۆ دڵنیابوون لە کەمکردنەوەی بڵاوبوونەوەی بەکتریا زیانبەخشەکان، بەڵام لەوەش گرنگتر تێگەیشتن لە سەرچاوەی بەکتریاکان و شێوازی گواستنەوەیان بەمەبەستی باشتر کۆنترۆڵکردنیان.