دەستەی ڕاگەیاندن و پەیوەندییەکانی عێراق ڕۆژی چوار شەممەی داهاتووی وەك دوا مۆڵەت بۆ کۆمپانیای کۆڕەک دیاری كرد تاوەکو قەرزەکانی بداتەوە.
دەستەی ڕاگەیاندن و پەیوەندییەکانی عێراق لە ڕاگەیەنراوێكدا ئاماژەی بەوەكردووە، سەرلەبەیانی ئەمڕۆ دوو شەممە، دەستەی کۆمسیارانی کۆمیسیۆنی پەیوەندییەکان و ڕاگەیاندن دانیشتنی ئاسایی خۆی بە سەرۆکایەتی مەحمود الروبەیعی و بە ئامادەبوونی ئەندامانی دەستەی کۆمسیاران ئەنجامدا، بۆ تاوتوێکردنی کۆمەڵێک فایل لە بەرنامەی کاردا، دیارترینیان ڕێکارە یاساییەکانی پەیوەست بە کۆمپانیای کۆڕەک تیلیکۆم بوو.
دانیشتنەکە بە سەرۆكایەتی محەمەد عەبدوڵڵا عەبدولئەمیر، سەرۆکی دەستەی جێبەجێكردنی دەستەكە بوو بۆ تاوتوێکردنی ئەو ڕێوشوێنە یاساییانەی، کە دەبێت بەرامبەر کۆرەک تیلیکۆم بگیرێتەبەر، دوای ئەوەی پەیوەندیی نێوان كۆڕەك و باقی کۆمپانیاکانی مۆبایلی مۆڵەتپێدراو پچڕێنران.
جەختیکردەوە، لەسەر پێویستی بەردەوامبوون لە ڕێکارە یاساییەکان بۆ دڵنیابوون لەوەی کۆمپانیاکە قەرزەکانی بە دەوڵەتی عێراق دەدات، بە هەماهەنگی لەگەڵ دەسەڵاتە ڕێکخەرییە پەیوەندیدارەکان، بۆیە ڕۆژی چوار شەممەی داهاتوو وەک دوا وادەی چارەسەرکردنی ئەم پرسە دیاریکرد و ئەو وادەیە ناتوانرێت درێژبکرێتەوە دوای تێپەڕبوونی ساڵانێك بەبێ ئەوەی کۆمپانیاکە هیچ ڕێگەچارەیەکی پراکتیکی بەرجەستە بۆ چارەسەرکردنی قەرزە کەڵەکەبووەکانی بگرێتەبەر.
دەشڵێت: گفتوگۆی لەسەر پەیڕەوی چوارچێوە بۆ پلاتفۆرمە دیجیتاڵییەکان و خزمەتگوزارییەکان کرد، کە باس لە چوارچێوەی یاسایی و ڕێکخراوەیی بۆ بەکارهێنانە جیهانییەکان دەکەن، بەپێی ستانداردە نێودەوڵەتییەکان بیرۆکە و پێشنیارەکان خرانەڕوو، کە ئامانجیان ڕێکخستنی کاری کۆمپانیاکان و ئەپڵیکەیشنە دیجیتاڵییەکانە لە عێراق، دڵنیابوون لە پابەندبوون بە کۆنتڕۆڵە یاساییەکان و پاراستنی مافی بەکاربەران.
