لە هەفتەی داهاتووەوە هەناردەکردنەوەی نەوتی هەرێمی کوردستان لە ڕێی کۆمپانیای سۆمۆی عێراقەوە دەستپێدەکات.
ئەمڕۆ دووشەممە، حەیان عەبدولغەنی، وەزیری نەوتی عێراق ڕایگەیاند، لە هەفتەی داهاتووەوە دەستدەکرێتەوە بە هەناردەکردنی نەوتی هەرێمی کوردستان.
ئەوەشی خستەڕوو کە هەرێمی کوردستان ڕۆژانە 300 هەزار بەرمیل نەوت ڕادەستی بەغداد دەکات.
سەرەتای ئەم مانگە ئەنجومەنی نوێنەرانی عێراق هەمواری یاسای بودجەی گشتیی پەسەندکرد کە ڕێخۆشکەربوو بۆ کردنەوەی گرێکوێرەی نەوت لە نێوان هەرێمی کوردستان و عێراقدا.
دوێنێش د. لەتیف ڕەشید، سەرۆک کۆمار واژۆی لەسەر هەمواری یاساکە کرد و بە بڵاوکردنەوەشی لە ڕۆژنامەی وەقائیعی عێراقدا دەکەوێتە بواری جێبەجێکردنەوە.
لە ساڵی 2023ەوە هەناردەکردنی نەوتی هەرێمی کوردستان لە ڕێی بەندەری جەیهانی تورکییەوە ڕاگیرا، ئەویش دوای ئەوەی دادگای ناوبژیوانی پاریس ئەنقەرەی پابەندکرد بە 1.5 ملیار دۆلار قەرەبوو بە بەغداد بە هۆی ئەوەی بە بێ ڕەزامەندی حکومەتی عێراق ڕێی بە هەناردەکردنی نەوتی هەرێم داوە.
