کەشناسێکی کورد زانیاری لە بارەی هاتنی شەپۆلێکی بەهێزی سەرماو بەفر و بارانبارین دەخاتەڕوو، ئاشکراشیدەکات، کە زۆرترین ڕێژەی دابارینی بەفرو باران شەوی پێنجشەممە لەسەر هەینی دەبێت.
ئاراس جەبار، شارەزا لەبواری کەشناسی بە “تۆڕی میدیایی خەڵک”ی ڕاگەیاند: نیوەرۆی رۆژی پێنجشەممە، بەهێزترین شەپۆلی سەرما و بەفروبارانبارین هەرێمی کوردستان دەگرێتەوە و زۆرترین رێژەی دابارینی بەفر و باران نێوان شەوی پێنجشەمە بۆ بەرەبەیانی رۆژی ھەینی دەبێت.
ئەوەشی خستەڕوو: شەپۆلی بەفر و بارانبارین بەشێوەی پچڕ پچڕ و رێژەی لاواز بۆ مامناوەند تا ناوەراستی ھەفتەی داھاتوو 24/2/2025 دەخایەنێت و پاشان کۆتایی پێدێت.
ئەوەشی وت: ساردترین ماوەی شەپۆلەکە رۆژانی 22 تا 26ی مانگ دەبێت پلەکانی گەرما بەرێژەی 8 تا 14 پلە بەجیاوازی ناوچەکان نزمدەبنەوە و لەناوچە شاخاویەکان نزمترین پلەکانی گەرما 10 تا 18 پلە بۆ ژێر سفر نزمدەبێتەوە لەتەواوی ناوچەکان و سەنتەری شارەکانیش بۆ سفر و چەند پلەیەک ژێر سفر نزمدەبنەوە و ساردترین ماوەی زستانی ئەمساڵ لەناوچەکەدا دەستپێدەکات.
ئەو کەشناسە کوردە، ئەوەشی باسکرد: لەماوەی ئەو شەپۆلەدا ئەگەری بارینی بەفرێکی زۆر هەیە، لە ناوچە شاخاویەکان لە 50 سامتیمەتر تا زیاتر لە یەک مەتر، لەناوچە نزمەکانیش بارانێکی باش دەبارێت، لەگەڵ داخڵبوونی تەواوەتی شەپۆلە جەمسەریەکە بۆ سەر ناوچەکانی ھەرێم و عێراق لە رۆژانی 22 بۆ 24 مانگ بەفر بارین سەنتەری شارەکانیش دەگرێتەوە و لە شاری سلێمانی و ھەڵەبجە و دھۆک بەفر دەبارێت لەگەڵ ئەگەرێکی لاوازیش بۆ شاری کەرکوک و ھەولێر.
ئەوەشی خستەڕوو: ئەم نزمەپاڵەپەستۆیە کە لەجەمسەری باکوورەوە روو دەکاتە ناوچەکە بەشێوەی وشکە سەرما کاریگەریەکانی تا باشووری و عێراق و ئێران و بلادشام و باکوری سعودیە درێژ دەبێتەوە بەم شێوەیەک مەودایەکی گەورە و فراوانی وڵاتانی ناوچەکە دەکەوێتە ژێر کاریگەریەکانیەوە.
لەلایەکی دیکەوە بەڕێوەبەرایەتی ئاوی سلێمانی بڵاویکردەوە: لە 24 كاتژمێری ڕابوردوو 13.3 مليمەتر باران لەشاری سلێمانی باریوە، كۆی گشتی بارانبارین لە سلێمانی گەیشتووەتە 269.6 ملیمەتر.
