وەزارەتی شارەوانی و گەشتوگوزاری هەرێم ڕایگەیاند، كاركردن لە پرۆژەی نۆژەنكردنەوەی بازاڕی قەیسەریی هەولێر پەلەی تیادا دەكرێت و هەوڵدەدرێت بەر لە جەژنی ڕەمەزان، ئەو كارانەی هێشتا ماون تەواو بكرێن و بازاڕەكە بە تەواوەتی لەلایەن كاسبكارانەوە بەكار بهێنرێتەوە.
وەزارەتەکە دەشڵێت، سەرۆکایەتیی شارەوانیی هەولێر سەرپەشتیارانی بەشی شوێنەواری پڕۆژەی نۆژەنکردنەوەی بازاڕی قەیسەریی هەولێری ڕاسپاردووە هەرچی زووە کارەکانیان خێراتر بکەن و پەلە بکرێت بۆ ئەوەی بەزووترین کات کاسبکارانی بازاڕەکە بەر لە جەژنی ڕەمەزان لە ئیشوکارەکانیان دەست بە كارەكانی خۆیان بكەنەوە.
ئەوەشی وتووە: ئێستا کاری نۆژەنکردنەوەی بازاڕی قەیسەریی هەولێر بەردەوامە و بەشێک لە دوکاندار و خاوەنکارەکانیش گەڕاونەتەوە سەر ئیشوکارەکانیان و هەوڵدەدرێت بەر لە جەژنی ڕەمەزان زۆرترین کاسبکاری دیکەی بازاڕەکە بگەڕێنەوە سەر شوێنی کارکردنی ڕۆژانەی خۆیان.
