یەکەم سەبەتەی بەشەخۆراکی مانگانەی ئەمساڵ دابەش دەکرێت و لە بارەی بەشەخۆراکی تایبەت بە مانگی ڕەمەزانیش بەڕێوەبەری دابەشکردنی خۆراکی سلێمانی ڕوونکردنەوە دەدات.
کامەران فەتاح، بەڕێوەبەری دابەشکردنی خۆراک لە سلێمانی بە “تۆڕی میدیایی خەڵك”ی ڕاگەیاند: دوو جۆر خۆراک لە ئارادان بۆ ئەوەی لەم مانگە دابەش بکرێن.
وتیشی: “خۆراکێکیان بەشەخۆراکی مانگانەیە کە بەردەوامە و مانگانە دابەش دەکرێت، ئەوەی تریش سەبەتەی خۆراکی تایبەت بە مانگی پیرۆزی ڕەمەزانە، کە تا ئێستا هیچ شتێکمان بە فەرمی لەو بارەوە بۆ نەهاتووە و تەنها لە ڕاگەیاندنەوە باسی لێوەکراوە”.
باسی لەوەشکرد: دەست بە دابەشکردنی سەبەتەی خۆراکی مانگی یەکی ئەمساڵ دەکەن لە هەفتەی داهاتووەوە، لە ئێستاشدا جگە لە برن و زەیت، سەرجەم ماددەکانی تر لە کۆگاکاندا هەیە و لە 20ی ئەم مانگەوە دەست بە دابەشکردنی دەکرێت.
لەلایەکی دیکەوە وەزارەتی بازرگانی عێراق بڵاویکردەوە، لەم هەفتەیەدا بەشە خۆراکی مانگی رەمەزان دەگاتە سەرجەم گەنجینەکانی پارێزگاکانی عێراق و هەرێمی کوردستان.
باسی لەوەشکرد: بۆ سەبەتەی خۆراکی ئەم مانگە چوار ماددەی سەرەکیشی بۆ زیادکراوە لە نزیکترین کاتدا دەست بە دابەشکردنی دەکرێت.
هاوكات ئەوەشخراوەتەروو: سەبەتەی خۆراکی مانتی رەمەزان 11 ماددە لە خۆدەگرێت، کە چوار ماددەیان نوێیە و پێکهاتووە لە (ئاردی سفر، مەعکەرۆنی، شعریە و نیشاستە).
